«Эбола безгегинин жайылышы уланып жаткандыгына байланыштуу Кытай Африка өлкөлөрүнө мындан ары да мүмкүн болгон жардамын жана колдоосун көрсөтүп, оорунун жайылышын мүмкүн болушунча тез арада токтотууга көмөктөшүүгө ниеттенүүдө». Бул тууралуу 4-августта Кытайдын Тышкы иштер министрлигинин расмий өкүлү Линь Цзянь билдирди. Бул тууралуу ССТВ+ NazarNewsка билдирди. 

Ал 1-августта Демократиялык Конго Республикасына (ДКР) медициналык эксперттердин үчүнчү тобу келгендиги тууралуу суроого жооп берип жатып билдирүү жасады. Эксперттер тобу ДКРдин борбору Киншасага барган.

Линь Цзяндын айтымында, Эбола безгегинин жаңы очогу башталгандан бери Кытай эпидемиологиялык кырдаалга өзгөчө көңүл буруп, ДКРге жана эпидемиядан жабыркаган башка өлкөлөргө жардам көрсөтүү үчүн медициналык эксперттердин бир нече тобун жөнөтүп келет. Бул чаралар эл аралык коомчулук тарабынан оң бааланган.

Үчүнчү эксперттик топтун курамына эпидемиология, санитардык-карантиндик көзөмөл, клиникалык дарылоо жана инфекция козгогучтарын лабораториялык диагностикалоо тармагындагы адистер кирген.

Линь Цзянь буга чейинки эксперттик топтордун тажрыйбасына таянып жана учурдагы эпидемиологиялык кырдаалды эске алуу менен Кытай ДКР жана эл аралык уюмдар менен тажрыйба алмашууну жана кызматташууну мындан ары да тереңдетерин билдирди.

«Учурда Эбола безгегинин эпидемиясы уланууда. Кытай Африкада иштеп жаткан медициналык адистеринин мүмкүнчүлүктөрүн толук пайдаланып, Африка өлкөлөрүнө мындан ары да колдон келген жардамын көрсөтүүгө жана аларга кыйынчылыктарды мүмкүн болушунча тез арада жеңүүгө көмөктөшүүгө даяр», — деп кошумчалады Кытай ТИМинин расмий өкүлү.