Кытайдын БУУдагы туруктуу өкүлүнүн орун басары Гэн Шуанг 21-сентябрда Азербайжан менен Арменияны Тоолуу Карабак аймагындагы кырдаалдын соңку курчушуна байланыштуу талаш-тартыштарды диалог жана консультациялар аркылуу чечүүгө чакырды. Бул тууралуу NazarNews маалыматтык агенттигине кытайлык CCTV plus агенттиги билдирди.

Ушул эле күнү БУУнун Коопсуздук Кеңеши Азербайжан менен Армениянын тышкы иштер министрлеринин катышуусунда Тоолуу Карабак аймагындагы кырдаал боюнча жыйын өткөрдү.

Жыйында БУУнун Башкы катчысынын Европа, Борбордук Азия жана Америка боюнча жардамчысы Мирослав Енча Тоолуу Карабактагы кырдаал боюнча маалымат берип, бардык кызыкдар тараптарды жетишилген ок атышууну токтотуу келишимин ишке ашырууга жана гуманитардык жардамдын толук жеткиликтүүлүгүн камсыздоого чакырды.

Гэн Шуан жыйында сүйлөгөн сөзүндө Кытай Тоолуу Карабак аймагында болуп жаткан окуяларга тынчсызданып жатканын жана ок атышпоо келишими ишенимдүү сакталып, тараптар кырдаалдын мындан ары начарлашынан сактанууга үмүттөнөрүн билдирди.

"Армения менен Азербайжан кошуна мамлекеттер, аларды бири-биринен ажыратууга болбойт. Талаш-тартыштарды диалог жана кеңешүү жолу менен чечүү эки өлкөнүн түпкү кызыкчылыктарына жооп берет жана аймактык тынчтыкты жана туруктуулукту биргелешип камсыз кылууга салым кошот. БУУнун Коопсуздук кеңешинин буга чейинки жыйындарында Кытай Тараптар кырдаалдын курчушуна, курмандыктарга жана гуманитардык абалдын начарлашына жол бербөө үчүн эки өлкө тең сабырдуулукту сактоону дайыма жактап келген”, - деди кытайлык дипломат. 

Гэн Шуан Кытай эки тараптын өз ара ишенимди бекемдөөнү жана өз тараптарынын ортомчулугу аркылуу жарым жолдо жолугууну улантуу каалоосун колдой турганын баса белгиледи. Кытай тарап бул максатка жетүү үчүн бардык дипломатиялык аракеттерди колдойт жана бул багытта конструктивдүү роль ойнойт.

Эске сала кетсек, Армения менен Азербайжандын Тоолуу Карабак боюнча чатагы 1988-жылдан бери токтой элек. Тынчтык сүйлөшүүлөрү 1994-жылы ок атышпоо келишими макулдашылгандан бери жүрүп келет.

Булак: NazarNews.kg