17-августта Беларусь президенти Александр Лукашенко Минскиде Кытай Эл Республикасынын Мамлекеттик кеңешинин мүчөсү, коргоо министри Ли Шанфу менен жолугушту. Бул тууралуу NazarNews маалымат агенттигине Кытайдын CCTV plus агенттиги маалымдады.

Александр Лукашенко Ли Шанфудан Кытай Эл Республикасынын Төрагасы Си Цзиньпинге бардык белорус элинин чын ыкластуу саламын жеткирүүнү суранды, ошондой эле Беларуска көрсөткөн колдоосу үчүн Кытайга чын жүрөктөн ыраазычылык билдирди. Ал белгилегендей, Беларус менен Кытайдын тышкы саясаты абдан координацияланган, эки мамлекет тең эл аралык мамилелерде калыстыктын жана адилеттиктин, ошондой эле көп полярдуу дүйнөнүн коргоочусу.

Александр Лукашенконун айтымында, Беларус Кытайдын төрагасы Си Цзиньпин тарабынан коюлган маанилүү концепцияларды жана демилгелерди чечкиндүү колдойт жана Кытай менен бирге планетадагы тынчтыкка жаңы салым кошууга даяр.

Эки өлкөнүн армияларынын ортосундагы байланыштар ийгиликтүү өнүгүп жатканын белгилеген беларус лидери тараптар биргелешип иш алып барып, аймактагы улуттук коопсуздукту жана стабилдүүлүктү сактоодо конструктивдүү ролду ойной турганына ишеним билдирди.

Өз кезегинде Ли Шанфу Александр Лукашенкого Кытайдын төрагасы Си Цзиньпиндин жылуу саламын айтты. Эки мамлекет башчыларынын стратегиялык жетекчилиги астында Кытай-Беларус мамилелери ар тараптуу стратегиялык өнөктөштүккө көтөрүлгөнүн эске салып, Ли Шанфу Кытай Беларусь менен эки өлкөнүн ортосундагы өз ара пайдалуу кызматташтыкты тереңдетүү үчүн кызматташууга даяр экенин баса белгиледи. 

Ли Шанфу Кытай менен Беларустун куралдуу күчтөрүнүн кызматташтыгы ырааттуу өнүгүп жатканын, стратегиялык байланышта, биргелешкен машыгууларда жана мелдештерде жемиштүү натыйжаларга жетишкенин белгиледи.

Тараптар эки мамлекет башчыларынын жетекчилиги астында армиялар аралык байланыштарды үзгүлтүксүз өнүктүрүү үчүн биргелешкен күч-аракеттерди жумшоого макулдашышты, деп ырастады Ли Шанфу.

Булак: NazarNews.kg