Кашкадарыя облусунун Шахрисабз районундагы №38 мектептин 11-классынын окуучусу Элёр Абдураупов аны директор менен орун басары сабаганын билдирүүдө.

Окуучунун айтымында, буга мектеп директору тууралуу тамаша иретинде жасалган видеонун «ТикТок» социалдык түйүнүнө жарыяланганы себеп болгон.

– Мен тамаша катары директор жөнүндө видео жасагам. Аны интернетке чыгарайын деген оюм жок болчу. Классташтарыма көрсөтүп, бирөөнө жөнөтүп койгом. Алар видеону «ТикТокко» чыгарышыптыр. Видео адамдардын жүзүн алмаштырууга мүмкүндүк берген Noizz тиркемесинде тамаша катары гана жасалган, ​– деди Абдураупов.

Ал видео интернетке жарыялангандан кийин директордон кечирим сураганын кошумчалады.

– Мен өзүм да, ата-энем да директордон кечирим сураганбыз. Бирок ал бизди сөгүп, өч аларын айткан. 1-майда директордун иш бөлмөсүндө алгач анын орун басары мени бетке урду. Андан соң директор өзү желкемен алып, курсак тарапка эки жолу, бетиме бир жолу уруп жиберди. Бул учурда бөлмөдө бир нече мугалим бар болчу, – деди Абдураупов.

Окуучунун апасы Зулайхо Расулованын айтымында, 1-майда уулунун абалы начарлап, тез жардам чакырышкан.

Райондук ооруканадан Абдурауповдун «ич көңдөйүндөгү жумшак ткандар жабыркаганын» билдиришти.

Бул окуядан кийин окуучунун ата-энеси милицияга арыз менен кайрылган.

Өз кезегинде мектептин директору Акмаль Рахмонов Элёр Абдурауповго кол көтөрбөгөнүн билдирүүдө. «Мен ага чыпалагым менен да тийген жокмун. Кол көтөргөн болсом экспертиза аныктап берсин. Ал менин «Телеграмдагы» сүрөтүмдү алып, бийлеп жаткан башка кишинин бети менен алмаштырып коюптур. Ал мени уят кылды. Бул үчүн ата-энесине айып пул салынышын талап кылам. Аларга каршы Административдик жоопкерчилик кодексинин 47-беренеси боюнча кылмыш иши козголду», – деди директор.

Шахрисабз райондук ички иштер башкармалыгы Расулованын арызынын негизинде окуучунун сабалышы боюнча кылмыш иши козголгонун билдирди.

– Окуучунун сабалганы боюнча экспертиза дайындалды. Абдурауповдун телефону да экспертизага жөнөтүлдү. Бул экспертизалардын жыйынтыгы чыккандан кийин гана чечим кабыл алабыз», — деди мекеменин өкүлү.

Булак: NazarNews.kg