Өзбекстан президенти Шавкат Мирзиёев өзүнүн алгачкы эксклюзивдүү маегин казакстандык «Казинформ» маалымат агенттигине берди.

Мирзиёевдин айтымында, Борбордук Азиянын өнүгүүсү үчүн өзбек-казак мамилелери өзгөчө мааниге ээ. «Кезинде бекеринен эки мамлекет ортосунда стратегиялык өнөктөштүк тууралуу документке кол коюлган эмес. Ал чынында эле бардык багыттар боюнча маселелерди камтыйт», – деди өзбек мамлекет башчысы.

Мирзиёев Казакстан президенти Нурсултан Назарбаев менен болчу жолугушуусу маалында биргеликте аймактагы абалга анализ жүргүзүп, эки тараптуу мамилелерди күчөтүү жана аларды жаңы деңгээлге көтөрүү боюнча бардык мүмкүнчүлүктөрдү карап чыгууга үмүттөнөрүн айтты.

Ошондой эле өзбек лидери Казакстан башчысы менен Ооганстан көйгөйүн талкуулоо ниетинде. Мирзиёевдин айтымында, бул бүтүндөй аймак үчүн чакырык жана Ташкент дагы, Астана дагы ооган көйгөйүнүн тез арада жайгарылышына кызыктар.

Өзбекстан президентинин Казакстанга алгачкы расмий сапары ушул жылдын 22-23-март күндөрү болот.

Булак: "centralasian.org"