Резиденциясы басып алынган нааразылык акцияларына байланыштуу өлкөдөн чыгып кеткен Шри-Ланканын мурдагы президенти Готабая Ражапакса аралга кайтып келди. Бул тууралуу «Ада Дерана» басылмасы жазып чыкты.

Маалыматка ылайык, Раджапакса 12-июлда жубайы Иома жана коопсуздук кызматынын эки кызматкери менен Мальдив аралдарына аскердик учак менен келген. Кийинчерээк Шри-Ланканын аба күчтөрү саясатчынын кетиши үчүн азыркы өкмөттүн өтүнүчү боюнча аскердик учак бергенин ырастады.

Эки күндөн кийин экс-президент Сауд аба жолдорунун учагы менен Сингапурга жөнөп кетти, деп билдирет агенттик. Сингапур өкмөтү анын жашоого уруксатын узартты, бирок анын мөөнөтү 11-августта бүттү. Сингапур өкмөтү Раджапакса жеке иш сапары менен болгонун жана башпаанек берилбегенин түшүндүрдү. Сингапурда жүргөндө Раджапакса кызматтан кетүү боюнча арыз жазган.

Андан кийин экс-президент убактылуу башпаанек алуу үчүн Таиландга учуп кеткен. Таиланддын тышкы иштер министри Дон Прамудвинай Раджапакса дипломатиялык паспорту бар болгондуктан Таиландда 90 күн жүрө аларын тактады.

Эске салсак, Шри-Ланкадагы баш аламандык 9-июлда демонстранттар президенттик резиденцияга чабуул жасап, кийинчерээк ошол кездеги премьер-министр Ранил Викрамасингхтин үйүн өрттөп жибергенден кийин күчөгөн. Экономикалык кризистен улам жаз айларында митингдер башталган.

15-июлда Раджапакса отставкага кеткенден кийин Викрамасингхе президенттин милдетин аткаруучу болуп калды. Ал уланып жаткан нааразылык акцияларынан улам эки жолу өзгөчө кырдаал жана коменданттык саат киргизген. Раджапакса мөөнөтү бүтө электе пенсияга чыккандыктан, президентти парламент шайлады. 20-июлда 225 депутаттын 134ү Викрамасингхенин талапкерлиги үчүн добуш берди. Ал 2024-жылы өлкөдө жаңы улуттук шайлоо өткөнгө чейин кызматта калат.

Булак: NazarNews.kg