Кыргызстанда энергетика тармагындагы талаш-тартыш күчөп, Таалайбек Ибраев жетектеген министрлик жеке бөлүштүрүүчү компаниялардын дооматтарын четке какты. Бул жооп коомчулуктагы талаптарды канааттандырган жок. 

Анткени, негизги маселе тариф саясатына байланыштуу министрлик “бирдиктүү тариф чыныгы чыгымды чагылдырат” деп жүйө келтирет. Бирок калк үчүн электр баасы кантип эсептелери, импорттун үлүшү канча экени жана чыгымдар канчалык негиздүү экендиги толук түшүндүрүлгөн жок. 

Ошондой эле, Кыргызстан өзү өндүргөн электр энергиясы жетишсиз болуп, жыл сайын коңшу өлкөлөрдөн сатып алууга аргасыз. Бул системалык көйгөй, бирок анын жүгүн толугу менен керектөөчүгө же жеке компанияларга жүктөө туурабы деген суроо жаралат.

Расмий маалымат боюнча, 2020-жылы 15,4 млрд кВт/саат болгон керектөө 2025-жылга карата 19,3 млрд кВт/саатка жеткен. Бул өсүш алдын ала божомолдонуп, тиешелүү инфраструктуралык чаралар көрүлүшү керек эле. Бирок бүгүнкү талаш-тартыштар тармакта стратегиялык пландоо жетишсиз болгонун көрсөтүп турат.

Бул жагдай узак мөөнөттүү чечимдердин жоктугун айгинелейт. Электр тартыштыгы жыл сайын кайталанып келет. Импортко көз карандылык азайбай жатат. Бул шартта министрликтин учурдагы саясаты көбүнчө убактылуу чаралар менен чектелип жаткандай таасир калтырат.

Андыктан, Таалайбек Ибраев жетектеген министрлик айрым дооматтарды четке какканы менен, тарифтердин негиздүүлүгү, тармакты өнүктүрүү стратегиясы жана жеке сектор менен иштөө принциптери боюнча ачык, далилдүү жана ишенимдүү жоопторду бере элек.