Америкалык астрономдор Күндүн келечектеги эволюциясын изилдеп, анын акыркы баскычында Жердин тагдыры кандай болушу мүмкүн экенин айтып чыгышты.

Окумуштуулар Күнгө окшош жылдыздардын өмүрүнүн акыркы этабын изилдөө аркылуу биздин жылдыздын болжол менен 5 миллиард жылдан кийинки абалын түшүнүүгө аракет кылууда. Бул изилдөөлөрдүн алкагында Жерден болжол менен 5 миң жарык жылы алыстыкта, Эгиздер топ жылдызында жайгашкан NGC 2392 планетардык тумандуулугу да каралган.

НАСАнын маалыматына ылайык, мындай объект Күнгө окшош жылдыздын жашоосунун акыркы баскычтарынын бирин көрсөтөт.

Күн азыр өзөгүндө суутекти гелийге айлантып, энергия өндүрүп жатат. Бирок миллиарддаган жылдардан кийин өзөктөгү суутек түгөнө баштаганда, анын түзүлүшү өзгөрүп, Күн кескин чоңоюп, кызыл гигантка айланат.

Божомолдор боюнча, бул этапта Күндүн көлөмү азыркыдан 100 эседен ашык чоңоюшу мүмкүн. Натыйжада Меркурий менен Венеранын жок болушу күтүлүүдө. Ал эми Жердин да Күндүн кеңейген сырткы катмарларынын таасиринен жок болуп кетүү коркунучу бар.

Ошол эле учурда бул Жердин жакын арада жок болорун билдирбейт. Кеп болжол менен 5 миллиард жылдан кийинки космостук процесстер жөнүндө болуп жатат. Андан тышкары, Жердин так тагдыры дагы деле илимий изилдөөлөрдүн предмети болуп саналат.

Демек, окумуштуулар «дүйнөнүн аягы» үчүн конкреттүү календардык күндү жарыялаган жок. Сөз Күндүн эволюциясына байланыштуу болжол менен 5 миллиард жылдан кийинки сценарий тууралуу жүрүүдө.