Өкмөттүн Баткен облусундагы ыйгарым укуктуу өкүлү болуп жаңы дайындалган Өмүрбек Суваналиевге «Мамлекеттик кызматынын 1-класстагы мамлекеттик кеңешчиси» класстык чини ыйгарылды. Бул тууралуу жергиликтүү басылмалар жазды.

Маалыматка ылайык, тийиштүү жарлыкка президент Садыр Жапаров 22-февралда кол койгон. Белгилей кетсек, 1-класстагы мамлекеттик кеңешчинин класстык чини «генерал-полковник» аскердик наамына теңештирилет.

Премьер-министр Улукбек Мариповдун 2021-жылдын 15-февралындагы буйругу менен Өмүрбек Суваналиев өлкөнүн эң оор регионунун башчысы болуп дайындалган.

Буга чейин Садыр Жапаров УКМКнын төрагасы Камчыбек Ташиевге генерал-лейтенант наамын берүү жөнүндө жарлыкка кол койгон. Мамлекет башчысынын жарлыгы менен генерал-майор наамы Ички иштер министри Улан Ниязбековго дагы берилген.

Булак: NazarNews.kg