Ооганстанда кыш каарын салып, экономикалык кризис тереңдей баштаганда эл аралык Кызыл Жарым Ай коому балдар арасында пневмония жана начар тамактануу учурларынын кескин көбөйгөнүн айтып чыкты.

Өлкө боюнча 33 ооруканада балдардын начар тамактануу учурлары 2022-жылга салыштырмалуу 90 пайызга көбөйгөн. Өткөн жылдын ноябрь айынын көрсөткүчү боюнча 5 жашка чейинки балдардын пневмония оорусу 55%ды түзгөн.

“Өткөн жылдагыга караганда Ооганстанда жакырчылыктын деңгээли өстү. Көпчүлүктүн үйүн жылытканга акчасы жок, балдары суукта күн кечирүүдө. Ошондой эле балдардын тамак-ашына акча жетишсиз болгондуктан, пневмония оорусу көбөйүп, балдардын начар тамактануусу көбөйүүдө”, - дейт эл аралык Кызыл Жарым Ай коомунун дарыгери Абдул Кайюм Азими.

Согуштук аракеттердин интенсивдүүлүгү олуттуу кыскарганына карабастан, Ооганстандагы гуманитардык кырдаал тынчсызданууну жаратууда. Калктын жарымынан көбү (24 миллион адам) гуманитардык жардамга муктаж, жарымы (20 миллион адам) азык-түлүктүн кескин жетишсиздигин башынан кечирүүдө.

Миллиондогон оогандыктар Орусия менен Украинанын ортосундагы эл аралык куралдуу кагылыштан улам келип чыккан эл аралык санкциялар жана экономикалык чыңалуудан улам тереңдеп бараткан экономикалык кризистин айынан күнүмдүк жашоо үчүн күрөшүп жатышат. Буудайдын, өсүмдүк майынын жана жер семирткичтердин баасы көтөрүлдү. Эл киреше булактарынан ажырап, бардык жыйымдарын жумшады. Айыл чарбасы жер титирөөлөрдөн, кургакчылыктан жана суу ташкындарынан жапа чеккен.

“Ооган эли мүмкүн эмес тандоо алдында турат: үйүн жылытуу же тамак-аш сатып алуу. Чынында, алардын да мүмкүнчүлүгү жок, ал эми тамактануу жана пневмония учурлары кооптуу темп менен көбөйүүдө. Ошондуктан биз өкмөттөрдү жана өнүктүрүү агенттиктерин Ооганстанга кайтып барып, ага муктаж болгон миллиондогон адамдарга жардам берүүнү улантууга чакырабыз, - деди эл аралык Кызыл Жарым Ай коомунун операциялар боюнча директору Мартин Шупп Ооганстандагы сапары учурунда.

Хажи Вали, күнүмдүк жумушчу, пневмония менен ооруган 8 айлык баланын атасы:

"Балабызды ушул жерден дарылап, үйгө алып барсак, кайра ооруп калат. Анткени жылытууга, негизги тамак-ашка акчабыз жок. Балдарымдын бири буга чейин пневмониядан каза болгон. Кимден жардам сурайын?", - деди айласы жок ата.

Маджабин, беш баланын энеси:

"Азыр балдар ооруп калса, аларды ооруканага алып барууга кирешебиз да, акчабыз да жок. Кыш башталды, жылына турган эч нерсебиз жок, балдарым үшүп жатат. Мен алардын ушинтип жашашы керек деп үмүтүмдү үзөм. Алардын жылуу кийимдери да жок", - деди аял.

Он жылдан бери отун саткан Аббас:

"Сатып алуучу жок. Элде акча жок. Өздөрүн багуу үчүн жумуш да таба алышпайт. Кедейлердин балдары же кышында тоңуп өлөт, же тирүү калуу үчүн таштанды өрттөөгө туура келет”, - деди Аббас.

Ооганстандын элинин өмүрүн куткаруучу жардам көрсөтүүнүн алкагында атайын Жарым Ай Коому башкарган иштер жүрүүдө жана 26 миллионго жакын адам медициналык жардам ала алат.  

Булак: NazarNews.kg