Бүгүн, 3-июнда Ак үйдүн алдына 200дөн ашуун адам чогулду. Алар «Сапат» лицейинин бүтүрүүчүлөрү жана мугалимдери. Ошондой эле «Сапат» лицейинин окуучуларынын ата-энелери дагы бар.

Чогулгандар 1-июнга караган түнү дайынсыз жоголгон «Сапат» эл аралык билим берүү мекемесинин президенти Орхан Инандыны тирүү табууну талап кылып жатышат.

Митингчилердин арасынан 5 адам Ак үйгө кирүүгө жөнөп кетти.

Эске салсак, 1-июнга караган түнү «Сапат» эл аралык билим берүү мекемесинин негиздөөчүлөрүнүн бири Орхан Инанды дайынсыз жоголгону белгилүү болгон. Ал үйүнөн 31-майда саат 18:00 чамасында чыгып кеткен. Саат 21:00дө жубайы менен телефон аркылуу байланышкан. Түндө саат 4:20да милицияга Орхан Инандынын унаасы 12-кичи райондогу көп кабаттуу үйдүн короосунда табылганы тууралуу маалымат келип түшкөн.

Булак: NazarNews.kg