Орусиялык блогер жана журналист Илья Варламов Кыргызстандын оң жана терс жактарын тизмектеди. Бул тууралуу ал өзүнүн Telegram баракчасына жазды.

«Укмуштуу табият, дээрлик Швейцариядагыдай. Эгер сиз тоолорду, көлдөрдү, токойлорду сүйсөңүз, анда сиз бул жердесиз. Боорукер жана жооп берген адамдар. Бул жерде ачка жана үйсүз калуу мүмкүн эмес. Ар дайым жардам беришет. Эң негизгиси өлкөнү Киргизия деп атабоо. Борбордук Азиядагы эң демократиялуу жана эркин өлкө. Диктаторлор жок! Мурдагы президенттер, мэрлер камакта. Дээрлик Түштүк Кореядагыдай. Тил менен эч кандай көйгөй болбойт – баары орусча сүйлөшөт. Орусия менен Кыргызстандын көптөгөн документтери бири-бирин тааныйт, мисалы нотариалдык жактан күбөлөндүрүлгөн ишеним каттар. Баары абдан арзан жана даамдуу! Жеткиликтүү баада кеңсе жана турак жайларды ижарага алуу. Юридикалык кызматтар жана медицина Орусияга караганда беш эсе арзан”, - деп жазат Илья Варламов.

Ал белгилегендей, Кыргызстанда бизнести каттоо оңой, салыктар аз. IT тармагында иштегендер үчүн “санариптик көчмөн визасы” бар.
«Жергиликтүү банктар россиялыктар үчүн карталарды оңой ачышат. Деңиз жок, бирок Ысык-Көл бар. Ал эми Ысык-Көл болсо деңиз эмнеге керек? Көптөгөн эң сонун жаштар, баары активдүү өнүгүп жатат. Бишкектен тажабайсаң, Алматыга чейин унаа менен болгону 4 саат жол», - деп улантты блогер.

Өлкөнүн кемчиликтерин санап, Илья Варламов шаарлар 1990-жылдардагыдай экенин баса белгиледи. Алар кооптуу жана ыңгайсыз. Тышкы жарнак боюнча көйгөйлөр бар экенин кошумчалады.

«Жакшы коомдук транспорт жок. Жол тыгындары байма-бай болуп турат. Чоң шаарларда начар экология. Бишкекте дем ала турган эч нерсе жок, анткени унаалардын көбү эски жана эч кандай стандартка жооп бербейт. Жөө жүргүнчүлөрдү сыйлашпайт. Архитектура жагынан, өзгөчө тарыхый жактан баары абдан кейиштүү. Аэропорт дагы жаңыланса болмок», - деп жыйынтыктады Илья Варламов.

Булак: NazarNews.kg