Еревандын Армения Жамааттык Коопсуздук Келишим Уюмунун (ЖККУ) машыгууларын өткөрбөй турганы тууралуу билдирүүлөрү тактала турганын Кремлдин басма сөз катчысы Дмитрий Песков билдирди.

Песковдун айтымында, Армениянын премьер-министри Никол Пашиняндын 2023-жылы ЖККУнун машыгууларын өткөрүүдөн баш тартуу тууралуу билдирүүсү “бир кыйла жаңы”, ошондуктан уюмдун мүчөлөрү Еревандын позициясынын чоо-жайын тактоо үчүн байланышып турмакчы.

"Кандай болгон күндө да, Армения биздин абдан жакын союздашыбыз, биз диалогду улантабыз, анын ичинде учурдагы өтө татаал маселелерди дагы", - деп ишендирди орус лидеринин маалымат катчысы.

Ал эми, ЖККУнун басма сөз кызматы өз кезегинде машыгуулар башка жерде да өтүшү мүмкүн экенин билдирди.

2023-жылы Армениянын аймагында ЖККУнун “Бузулбас бир туугандык-2023” машыгуулары өтүшү керек болчу. Бирок, 10-январда Армениянын премьер-министри Никол Пашинян ЖККУнун машыгуулары өлкө аймагында өтпөй турганынын билдирди.

2022-жылы Армениянын премьер-министри ЖККУнун Жамааттык коопсуздук кеңешинин декларациясына кол коюудан баш тартып, муну Азербайжандын Армениянын аймактык бүтүндүгүнө каршы “агрессиясына” уюм тарабынан саясий баа берилбегени менен түшүндүргөн. 10-январдагы маалымат жыйынында Пашинян орус бийлигин Арменияны Тоолуу Карабак менен байланыштырган жол өткөн Лачин коридорунун үзгүлтүксүз иштеши боюнча өз милдеттенмелерин аткарууга чакырды.

Булак: NazarNews.kg