Польшанын премьер-министри Матеуш Моравецкий Орусия Украинадагы атайын операция учурунда өзүнүн күчүн толук колдонбогонун билдиргенин РИА Новости жазды.

"Россия жаракат алган аюудай болуп турат… Кээ бир тараптар Украина менен кагылышта жеңилди деп бүтүмдү эрте чыгарып алышты. Бул (Россия — ред.) потенциалы чоң өтө күчтүү мамлекет. Мында анын бир бөлүгү гана ишке аралашты", — деди Моравецкий.

Польша премьер-министри шейшемби күнү Варшавада өткөн дипломатиялык корпустун жыйынына катышкан. Ал Европа биримдигинин кээ бир мамлекеттери украиналык аскерлердин куралды таштоосуна каршы эмес экенин кошумчалаган.

"Европа тилектештигине жарака кеткен. Украина куралын таштасын деген сунушту колдогон мамлекеттер бар", — деди ал.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Ошондон кийин АКШ жана НАТО өлкөлөрү Орусияга карата буга чейин болуп көрбөгөндөй катаал санкциялык чектөөлөрдү киргизген. Москва Батыштын мындай аракетин "экономикалык согуш" деп атоодо.

Үч айдан ашкан согушта эки тараптан тең аскерлер жана жайкын тургундардан миңдеген курмандыктар катталды. 

Булак: NazarNews.kg