Орусиянын президенти Владимир Путин телефон аркылуу сүйлөшүү учурунда түркмөн кесиптеши Сердар Бердымухамедовду 9-майда Москвада Жеңиштин 78 жылдыгына арналган салтанатка катышууга чакырды. Эки лидердин телефон аркылуу сүйлөшүүсү 7-майда болгон.

«Президенттер Сердар Бердымухамедов менен Владимир Путин бири-бирин келе жаткан Улуу Ата Мекендик согуштагы Жеңиш күнү менен чын жүрөктөн куттуктап, эки өлкөнүн элдерине бакубатчылык жана гүлдөп-өнүгүүнү каалашты. Мүмкүнчүлүктөн пайдаланып, Россия Федерациясынын башчысы түркмөн кесиптешин Жеңиштин 78 жылдыгына арналган салтанатка катышууга чакырды», — деп билдирет Түркмөнстандын мамлекеттик маалымат агенттиги.

Белгилей кетсек, ушул күндөрү президент Садыр Жапаров Россия Федерациясында иш сапары менен жүрөт. Ошону менен бирге 9-майда Улуу Жеңиштин 78 жылдыгына арналган салтанатка катышат.

Ал эми, буга чейин Владимир Путин Тажикстандын башчысы Эмомали Рахмонду да аталган салтанатка чакырганы белгилүү болгон.

Булак: NazarNews.kg