Кыргыз Республикасынын Саламаттык сактоо министри Дамир Осмонов Реджеп Тайип Эрдоган атындагы Кыргыз-Түрк достук ооруканасына барып, медициналык жардам көрсөтүүнүн уюштурулушу, клиникалык бөлүмдөрдүн иши жана жогорку технологиялуу дарылоо багыттарынын өнүгүшү менен таанышты.

Иш сапардын жүрүшүндө министрлик жетекчилигине медициналык мекеменин иши тууралуу маалымат берилди. Анын ичинде ооруканада колдонулуп жаткан медициналык маалыматтарды башкаруунун электрондук системасы тууралуу да айтылды. Бул система медициналык документацияны жүргүзүүдө, дайындоолорду жана дары-дармектерди эсепке алууда, ошондой эле мекеме ичиндеги дарылоо процессин координациялоодо колдонулат. Мунун натыйжасында дарыгерлер бейтаптар тууралуу керектүү маалыматты ыкчам ала алышат.

Министр ошондой эле бир катар клиникалык бөлүмдөрдү, анын ичинде кардиология кызматын жана заманбап диагностикалык жана дарылоо процедуралары жүргүзүлгөн ангиографиялык операциялык бөлмөнү көрүп чыкты.

Өзүнчө көңүл органдарды трансплантациялоо программасын өнүктүрүүгө бурулду. Оорукананын жетекчилигинин маалыматына ылайык, бөйрөктү трансплантациялоо программасы 2023-жылдан тарта түрк адистеринин катышуусунда ишке ашырылып келет. Бул мезгил аралыгында бейтаптарды тандоо жүргүзүлүп, операцияларды практикалык аткаруу башталган. Учурда 16 бейтапка бөйрөктү трансплантациялоо операциясы жасалды.

Медициналык мекемеде кийинки операцияларга бейтаптарды даярдоо иштери улантылууда. Азыркы учурда трансплантация жасоонун алдында керектүү медициналык текшерүүдөн өтүп, даярдык процедураларынан өтүп жаткан бейтаптардын тобу түзүлүүдө. Операциядан кийин бейтаптарга мындан аркы медициналык көзөмөл жана реабилитация камсыз кылынат.

Жолугушуунун жүрүшүндө трансплантация кызматын мындан ары өнүктүрүү, бейтаптарды тандоо процессин уюштуруу жана кийинки операцияларды пландаштыруу маселелери да талкууланды.