Кыргызстандын президенти Садыр Жапаров «Кыргыз Республикасынын санариптик трансформациясын натыйжалуу ишке ашыруу боюнча кечиктирилгис чаралар жөнүндө» жарлыкка кол койду. Документтин негизги чечими — санариптик өнүктүрүү жана инновациялык технологиялар министрлигин президенттин иш башкармалыгына кошуу жолу менен жоюу.

Жарлыкта президент мамлекеттик кызмат көрсөтүүлөрдү санариптештирүүдөгү прогресске карабастан, бизнес үчүн бюрократиялык тобокелдиктер дале олуттуу көйгөй бойдон калып жатканын, ал эми санариптештирүү «өз милдетин аткара албай жатканын» моюнга алган. Санариптик өкмөттүн ишин талдоо, өзгөчө жергиликтүү өз алдынча башкаруу органдарынын деңгээлинде олуттуу кемчиликтерди аныктаган.

Президенттин иш башкармалыгы министрликтин укук улантуучусу болуп, анын бардык функцияларын өзүнө алат: санариптештирүү жаатында саясатты иштеп чыгуу, мамлекеттик санариптик кызматтарды өнүктүрүү, байланышты жөнгө салуу, киберкоопсуздук, архив иши, спутниктик технологиялар, жасалма интеллект жана инновациялар.

Муну менен катар мамлекеттик органдарда санариптик өнүктүрүү боюнча жетекчилердин орун басарларынын кызматтары кыскартылууда — ИИМден тышкары. Штаттык бирдиктер жана каржылоо Президенттин иш башкармалыгына өткөрүлүп берилет.

Президенттин иш башкаруучусуна бир жумалык мөөнөттө министрликтин активдерин кабыл алуу-өткөрүп берүү боюнча комиссия түзүү, ал эми бир айлык мөөнөттө түзүмдүк бөлүмдөр, анын ичинде санариптештирүү жана инновациялык технологиялар департаменти, Байланышты жөнгө салуу боюнча департамент жана санариптик инфраструктураны өнүктүрүү фонду жөнүндө жаңы жоболорду иштеп чыгуу тапшырылды.

Министрлер кабинетине бир айдын ичинде санариптик кодекске жана башка мыйзам актыларына өзгөртүүлөрдү даярдоо, ал эми эки айлык мөөнөттө өз чечимдерин жарлыкка ылайык келтирүү милдеттендирилди.