Урматтуу мекендештер, кадырман калайык калк! Элдик Курултай кыймылынын демилгеси менен, Улуттук-мекенчил күчтөрдүн биримдигине кирген коомдук-саясий уюмдардын колдоосуна таянып,  ата бабалардын  жолун жолдоп  жана Баш мыйзамдын 52-беренесине негизденип, 2017-жылдын 31-март күнү борборубуз Бишкек шаарында  Улуттук Улуу Курултайдын кезектеги 3-жыйыны  өткөрүлөрү  туурасында  Билдирүү  жарыяланган.  Коомдук-саясий кырдаалга жараша Курултайды өткөрүү күнү ары же бери жыларын  да алдын ала эскерткенбиз.

УМКБнын мүчөлөрү жер жерлерди кыдыруу учурунда  азыркы туташ кризистен чыгуунун бирден бир туура жолу-  “ачык либералдык демократиялык коом” аталган батышчыл жолдон баш тартып, улуттук-мекенчил багытка түшүү, Элдик Курултай институтун   мыйзамдаштыруу  маселелерин  тездетүү зарылчылыгын  кыргыз коомчулугу талап кылып жаткандыгына күбө болдук. Бир катар  саясий күчтөрдүн өкүлдөрү Курултайды бөлүнүп - жарылбай биргелешип өткөрүү боюнча сунуштары менен чыгып жатышат.

Учурда оппозициялык маанайдагы саясатчылардын артынан куугунтуктардын күчөшү; митингдердин, массалык иш-чаралардын өтүшүнө каршылыктардын болуп  жатышы; экинчи жагынан Спорт сарайын сурап эбак эле кат жазганыбызга карабастан Курултай өткөрүүчү жай чечилбей келе жаткандыктан,  ж.б ушул сыяктуу себептерден улам  31-мартка белгиленген  жыйын белгисиз мөөнөткө   жылдырылгандыгын кабарлайбыз.

Урматтуу калайык калк! Кадырман мекендештер! Баарыңыздарды КРнын Жогорку Кеңеши  “Элдик Курултай жөнүндөгү”  мыйзамды  2017-жылдын 15-апрелине чейин кабыл алуусун  талап кылган жалпы элдик  тынчтык акцияларды  жер жерлерде  уюштурууга  жана активдүү катышууга чакырабыз.

Ишибиздин жыйынтыгын чыгаруу, коомдук-саясий абалга баа берүү, президенттик шайлоого  карата улуттук-мекенчил күчтөрдүн атынан талапкерлерди көрсөтүү максатында 2017-жылдын май айынан кечикпей Улуттук Курултайга чогуларыбыз айкын экенин билдиребиз.

Улуттук Улуу Курултайдын  3-жыйынын  Уюштуруу комитети

27.03. 2017-жыл   Бишкек ш