Өзбекстандын президенти Шавкат Мирзиёев Италиянын президенти Сержио Маттарелланын чакыруусу менен 7-9-июнь күндөрү бул өлкөгө расмий сапар менен барат.

Өзбекстандын президентинин басма сөз кызматы билдиргендей, жогорку деңгээлдеги жолугушуулар Римде өтөт. Шавкат Мирзиёев Сержио Маттарелла жана премьер-министр Жорж Мелони менен сүйлөшүүлөрдү өткөрөт.

Анда “Өзбек-италиялык көп кырдуу мамилелерди жана артыкчылыктуу багыттар боюнча практикалык өз ара аракеттенүүнү” өнүктүрүү маселелерин талкуулоо пландалууда. Мындан тышкары, эл аралык күн тартиби боюнча пикир алмашуу болот.

Өзбекстандын президенти штаб-квартирасы Италиянын борборунда жайгашкан Бириккен Улуттар Уюмунун Азык-түлүк жана айыл чарба уюмунун (ФАО) башкы директору Цю Донгю менен да жолугушат. Азык-түлүк коопсуздугун камсыз кылуу жаатында кызматташуунун маанилүү аспектилери талкууланат деп күтүлүүдө.

Сапардын бизнес программасы Миланда өтөт – Өзбекстандын президенти Ломбардия провинциясынын губернаторун кабыл алып, Италиянын алдыңкы компанияларынын жана уюмдарынын жетекчилери менен тегерек стол өткөрөт.

Булак: NazarNews.kg