Орусиянын коргоо министри Сергей Шойгу Шанхай Кызматташтык Уюмунун (ШКУ) согуштук потенциалын, өзгөчө аскердик коопсуздук жаатында маалымат алмашуу механизмдери аркылуу жогорулатууну сунуштады. Бул тууралуу ал бүгүн, 24-августта Ташкентте өтүп жаткан ШКУга мүчө мамлекеттердин коргоо министрлеринин жыйынында билдирди.

«ШКУнун аскердик потенциалынын натыйжалуулугун жогорулатуу. ШКУнун Коргоо министрлер кеңешинин алдындагы эксперттик жумушчу топтун ишин активдештирүү жана аны практикалык мазмун менен толтуруу. Ага биздин өлкөлөрдүн коргоо министрликтеринин ортосундагы кызматташуунун келечектүү багыттары боюнча сунуштарды даярдоо», - деди Шойгу.

Анын айтымында, «дрондорго каршы туруу, маалыматтык жана биологиялык коопсуздук» камтылышы мүмкүн.

Орусиянын Коргоо министри ошондой эле аскерлерди даярдоо жана биргелешкен машыгууларды өткөрүү практикасын өркүндөтүү, мыкты тажрыйба алмашуу, мыйзамсыз куралдуу топтор менен күрөшүүнүн жаңы ыкмаларын иштеп чыгуу зарылдыгын белгиледи. Ал тынчтыкты жана коопсуздукту камсыз кылуу ар дайым ШКУнун башкы приоритети болуп кала берерин айтып, уюмдун алкагында аскердик коопсуздук жаатында маалымат алмашуу механизмин иштеп чыгууну негизги милдеттердин бири деп атады.

«Мындай кызматташуунун укуктук негизин түзүү максатында биз Шанхай кызматташтык уюмуна мүчө мамлекеттердин коргонуу ведомстволорунун ортосунда ыкчам маалымат алмашууну уюштуруу жана коргоо боюнча Макулдашуунун долбоорун иштеп чыктык. Биз аны жакынкы аралыкта кароого жөнөтөбүз», - деди Шойгу.

Ал бүгүнкү жыйындын жыйынтыгы Шанхай кызматташтык уюмун дагы ырааттуу өнүктүрүүгө, уюмдун милдеттеринин алкагында туруктуулукту жана коопсуздукту сактоого бекем негиз болоруна ишеним билдирди.

Булак: NazarNews.kg