Финансы министрлигинин алдындагы "Ысык-Көлдү туруктуу өнүктүрүү" долбоорунун мамлекеттик сатып алуулар боюнча мурунку адиси кызмат абалынан кыянаттык менен пайдалануу фактысы боюнча кармалды. Бул тууралуу УКМКдан билдиришти.

"15-февралда кызмат абалынан кыянаттык менен пайдалануу фактысы боюнча Финансы министрлигинин алдындагы "Ысык-Көлдү туруктуу өнүктүрүү" долбоорунун мамлекеттик сатып алуулар боюнча мурунку адиси «Ж.М.Ж.» кармалды. Жүргүзүлгөн иш-чаралардын учурунда, Финансы министрлигинин жана Каракол шаарынын мэриясынын Каракол шаарындагы "Сууканал" ишканасынын жооптуу кызматкерлери, Ысык-Көл облусунун Каракол шаарында суу алуучу курулманы калыбына келтирүүдө жана курууда каржылык ресурстарды максатсыз пайдалануу жана курулуш иштеринин көлөмүн ашыкча баалоо фактылары аныкталды",- деп жазылат билдирүүдө.

Кармалган жаран 2014-2017-жылдар аралыгында жалпы 3 миллион 500 миң сомдон ашык сумманы түзгөн жумушту аяктагандыгы жөнүндө күбөлүктү кабыл алуу маселеси боюнча оң чечим үчүн ортомчулардан системалуу түрдө акча алган. Учурда кармалган жаран Каракол шаарындагы убактылуу кармоочу жайга киргизилди. Ал күнөөсүн толугу менен моюнуна алып, мамлекеттик бюджетке келтирилген 2 миллион сом зыяндын бир бөлүгүн төлөп берген.

Коррупцияга каршы күрөшүү кызматы мамлекетке келтирилген зыяндын ордун толтуруу боюнча оперативдик-иликтөө иш-чараларын улантууда, ошондой эле Каракол шаарындагы суу алуучу имаратты калыбына келтирүүдө жана курууда мыйзамсыз иш-аракеттерге катышкан башка кызмат адамдарын аныктоо боюнча иштер уланып жатат.

Булак: NazarNews.kg