Киевдин делегациясы НАТО саммитине катышпай турганын Украинанын тышкы иштер министри Дмитрий Кулеба «Украина-24» телеканалына берген маегинде билдирди. «Биз бул саммитке катышпайбыз, анда украин делегациясы болбойт», - деди ал.

Украинанын Тышкы иштер министрлигинин башчысы НАТОнун саммитинен кандайдыр бир «процессти» күтөсүзбү деген суроого: «Жок, тилекке каршы, күткөн жокмун. Анткени мен альянстын ичиндеги кырдаалды жана анын кандайдыр бир катаал, радикалдуу аракеттерге даярдыгын объективдүү баалайм. «Учурда, өзгөчө бүгүн, эртең үчүн, андай нерсе жок, бирок иштөө керек, натыйжасы, албетте, убакыттын өтүшү менен билинет», - деди ал.

Украинага НАТОнун бейпилдик миссиясын жөнөтүү мүмкүнчүлүгү тууралуу суроого Кулеба: «Ооба, бул революциялык демилге, аны ишке ашыруу үчүн альянстын бардык мүчөлөрүнүн консенсусу керек. Учурда андай консенсус жок», - деди.

Белгилей кетсек, 24-мартта уюмдун Брюсселдеги баш кеңсесинде Украинадагы кырдаал жана альянстын коргонуу жөндөмдүүлүгүн жогорулатуу боюнча НАТОнун чукул саммити өтөт. Буга чейин НАТОнун баш катчысы Йенс Столтенберг Украинага альянстын бейпилдик күчтөрүн жөнөтүү боюнча Польшанын сунушуна комментарий берип жатып, Түндүк Атлантика альянсы ал жакка аскерлерин жөнөтпөй турганын билдирген.

Анын айтымында, «Украинаны колдоо маанилүү, бирок Орусия менен НАТОнун ортосундагы согушту болтурбоо дагы маанилүү». Мындан тышкары, башкы катчы белгилегендей, НАТО дагы Украинанын үстүнөн учууга тыюу салынган аймакты түзүү мүмкүнчүлүгүн жокко чыгарууну улантууда, анткени бул Орусия менен согушту билдирет.

Булак: NazarNews.kg