Бүгүн, 1-февралда Жогорку Кеңештеги көпчүлүк коалиция өкмөттүн жаңы курамын дайындоо үчүн жыйынга чогулду. Анда премьер-министрлик кызматка талапкер көрсөтүү, ошондой эле өкмөттүн жаңы курамын бекитүү маселеси талкууланууда.

Көпчүлүк коалиция премьер-министрлик кызматка Эсептөө палатасынын төрагасы Улукбек Мариповду көрсөтүлүп, ал Өкмөт башчы болду. Аны «Республика-Ата Журт» фракциясы сунуштады.

Марипов 22 өкмөт мүчөлөрүнүн алтоосу кыскалаарын айтты.  

"Айыл чарба тармагы көтөрүлөт. Ал эми Айыл чарба министрлигинин статусу күчөйт", - деди ал. 

41 жаштагы Улукбек Марипов 2006-жылдан 2016-жылга чейин президенттик аппаратта ар кандай кызматтарда иштеп келген. Президенттик аппараттын жетекчи орун басары да болуп иштеген. Ал Эсеп палатасынын төрагалыгына 2016-жылдын март айында дайындалган.

Расмий эмес маалыматтар боюнча, Улукбек Марипов мурунку вице-премьер-министр Аскарбек Шадиевдин өкүл баласы экени айтылып жүрөт. Шадиев «кызмат абалынан кыянаттык менен пайдалануу», «мамлекеттик чек арадан мыйзамсыз өтүү» беренелери менен айыпталып, өлкөдөн чыгып кеткен.

Улукбек Мариповдун өмүр баяны:

Улукбек Марипов 1979-жылы 30-августта Ош облусунун Ноокат районуна караштуу Кыргыз-Ата айылында туулган. Ош шаарындагы техникалык университетин аяктаган. Ошондой эле Ош мамлекеттик университетинен финансы жана кредит, юриспруденция адистиги боюнча билимин тереңдеткен.

Билген тилдери:

Кыргыз, орус, англис

Эмгек жолу:

• 1997-2001 — "Кызыл Кетмен" дыйкан чарбасынын жетекчиси.
• 2001-2002 — КР Каржы министрлигинде жетектөөчү адис.
• 2002-2003 — Каржы министрлигинин кирешелер боюнча комитетинин төрагасынын жардамчысы.
• 2003-2005 — Баткен облусунун губернаторунун жардамчысы.
• 2005-2006 — Жогорку Кенештеги депутаттын консультанты.
• 2006-2008 — Президенттин администрациясынын уюштуруу иштери, көзөмөлдөө жана мамлекеттик башкаруу саясаты бөлүмүндө эксперти.
• 2008-жылдын октябрь айынан 2009-жылдын октябрына чейин – Президенттин администрациясынын уюштуруу жана мамлекеттик башкаруу саясаты бөлүмүндө мамлекеттик инспектор.
• 2010-жыл — КР Өзгөчө кырдаалдар министрлигинин эл аралык кызматташуу башкармалыгынын жетекчиси.
   
• 2010-жылдын декабрынан 2011-жылдын декабрына чейин – КР өкмөтүнүн аппаратынын уюштуруу-инспектордук жана аймактык башкаруу бөлүмүндө инспектор.
• 2011-жылдын декабрынан 2015-жылдын апрелине чейин КР президентинин жардамчысы.

• 2015-жылы Улукбек Марипов КР президентинин аппаратынын жетекчисинин биринчи орун басары болуп дайындалган.

  Ал 2016-жылдан бери Эсептөө палатасын жетектеп келген.

  Ал мамлекеттик кызматтын III класстагы кеңешчиси, мамлекеттик кызматтын отличниги.

  Эске сала кетсек, Мариповдун бир тууган иниси Бактыбек Марипов өткөн жылы ноябрда Ноокат районуна аким болуп дайындалган.

Булак: NazarNews.kg