Депутат Адахан Мадумаров мыйзам долбоорлорун кароону токтотуп, чындап маанилүү маселелерди талкуулоого өтүүнү сунуштоодо.

Жогорку Кеңештин 28-сентябрдагы жыйынында ал кечээ облустук телеканал кыргыз-өзбек чек арасы боюнча сюжет көрсөткөнүн белгиледи.

"Кечээ облустук телекомпаниядан Кемпир-Абад суу сактагычы Өзбекстанга өткөнүн айтты деп жатышат. Эл ызы-чуу болуп жатат. Өткөндө эле айтканда беш айыл өкмөттүн эли менен жолукмайынча ушул маселени токтотуп турсаңар дегенбиз. Президенти да, өкмөтү да макул болгон, анан жең ичинен барып кол койгондугу өлкөдө аябай будуң-чаңды жаратууда. Өлкөдөгү кырдаал гана эмес Жогорку Кеңештин ичиндеги кырдаал да жеңил эмес. Өткөндө коопсуздук кызматынын жетекчиси эки жашик автомат көтөрүп, парламенттин ичине кирип келгени — жапайычылык. Бул четтен чыккандык. Ар бир кыймыл-аракетке мыйзамдуулук, укуктук тарабынан баа беришибиз керек", — деди Мадумаров.

Эске салсак, 25-сентябрда УКМК төрагасы Камчыбек Ташиев Баткендеги «Кызыл-Бел» бекетинде Тажикстандын УКМК жетекчиси Саймумин Ятимов менен жолугуп, жаңжалды токтотуу, анын кесепеттерин жоюу жана мындан ары жол бербөө максатында протоколго кол койгон.

Анда эки тараптан үчтөн постту жана бирден заставаны алып салуу макулдашылган. Кыргыз тараптан «Булак-Башы», «Ак-Сай», «Катта-Туз» посттору жана «Тамдык» заставасы жоюлду.

Ал эми 26-сентябрда УКМК Кыргызстан менен Тажикстандын УКМК башчылары кол койгон протокол чек араны делимитациялоо жана демаркациялоо процесси аяктаганга чейин убактылуу экенин билдирди.

Булак: NazarNews.kg