“Айбек Жунушалиев Садыр Жапаров тарабынан сунушталды”, - деди бүгүн, 26-августта NazarNews маалымат агенттигине Бишкек шаардык кеңештин депутаты Жумабек Салымбеков.

--“Биздин “Эмгек” фракциясы жана барыбыз Айбек Жунушалиевди колдоп бердик. Көпчүлүк коалиция Жунушалиевди чакырып, пландарын угуп, сунуштарды бергенбиз.

3 айдын ичинде программаны бизге киргизип, тааныштырышы керек. Биздин сунуштарды, талкууга салып, иштешели дедим. Шаарды өнүктүрүүгө багытталган программаны чогу даярдайлы деген планды айттык. Иштөө мөөнөтүндө дагы жакшы көрсөткүчтөр болот го.

Бул адам саясатка, бизнеске аралашбаптыр. Эл үчүн иштеп бергенге аракет кылам деди. Бишкек шаарында көп жыдан бери депутат болгонго көпчүлүк мэрлер менен иштештим. Алар президент өкмөт башчылар менен тил табыша албай кызматтан кетишти. Өлкө башчы, башка жетекчилер менен тыгыз иштешсе шаарыбыз жакшы өнүкмөк. Борбордун көйгөйлөрүн жеңил чечет.

Бул адам Садыр Жапаровдун командасында чогу иштептир, Садыр Нургожоевич тарабынан сунушталды. Эми өкмөт менен тил табышып, финансы тармагын чечсе, борбор калабыз алдыга жылат деп ишеним бар”, - дейт депутат.

Кошумчалай кетсек, бүгүн, 26-августта Айбек Жунушалиев Бишкек шаарынын мэри болуп шайланды.

Ага 45 депутаттын 43ү Айбек Жунушалиевдин кызматка дайындалуусуна “макул” деген добуш берген.

Бишкек шаарынын мэри кызматына Айбек Жунушалиевдин талапкерлигин көпчүлүк коалиция жана Министрлер кабинети сунуштаган.

Эске салсак, ал 12-августта Бишкек шаарынын мэринин милдетин аткаруучу болуп дайындалган.

Булак: NazarNews.kg