Өзбекстан активдүү туризмди өнүктүрүүгө басым жасайт

Журналист: АЙСУЛУУ ТАЛАНТ

11.08.2026, 14:15

2857

борбордук азия жаңылыктары

Өзбекстанда тоо жана экстремалдык туризмди өнүктүрүү боюнча жаңы долбоор иштелип чыкты. Анда Казакстан, Кыргызстан, Швейцария, Австрия, Франция жана Грузия сыяктуу тоолуу өлкөлөрдүн тажрыйбасы эске алынган.

Долбоордун алкагында активдүү туризм үчүн потенциалы жогору 162 жаратылыш объектиси аныкталды. Алардын ичинде 88 тоо жана тоо массиви, 21 көл, 20 шаркыратма, 18 үңкүр жана 15 тоо чокусу бар.

Өлкөдө зиплайн, банджи-джампинг, родельбан, асма көпүрөлөр сыяктуу экстремалдык туризм объектилерин түзүү жана каттоо үчүн бирдиктүү тартип киргизүү пландалууда.

Ошондой эле тоолуу жана чек ара аймактарына баруу үчүн уруксаттарды электрондук түрдө алууга шарт түзүлөт. Гиддер менен тоо инструкторлорун эл аралык стандарттар боюнча даярдоого да өзгөчө көңүл бурулат.

Мындан тышкары, 2027-жылдан 2030-жылга чейин активдүү туризмге керектүү жабдууларды, анын ичинде квадроцикл, автокемпер, параплан жана тоо жабдууларын импорттоодо бажы төлөмдөрүн алып салуу пландалууда.

Өзбекстан бул чаралар аркылуу туристтик агымды көбөйтүп, жаңы жумуш орундарын түзүүнү жана активдүү туризмдин коопсуздугун жогорулатууну көздөп жатат.