АКШ Украинадагы кырдаалга күнөөлүү эмес экенин далилдөөгө аракет кылып жатат. Бирок эл аралык коомчулук Вашингтонго ишенбейт. Кытайдагы "Чжунго цзюньван" гезитиндеги макалада минтип жазылган. Басылманын баяндамачысы Се Линьлинь Орусиянын НАТОго байланыштуу тынчсыздануусу мыйзам ченемдүү экенин айтып, АКШны мурдагы советтик республикалардын аймагындагы жаңжалдарга негизги "демилгечи" катары айыптады. Украина кризиси АКШ өкмөтүнүн "отко май куюусунун" натыйжасы. Анткени АКШ өзүнүн гегемониясын сактап калууга жанталашып жаткан кези. Кошмо Штаттар өзүн күнөөсүз деп көрсөтүүгө аракет кылганы менен ал эл аралык коомчулукту алдай албайт.

Макалада айтылгандай, АКШ Орусия менен чыр-чатакты тутандырууга кызыкдар. Анткени муну менен Америка Европаны өнөктөш катары Москвага каршы тукуруп, ЕБдин үстүнөн көзөмөлдү күчөтүп алат.

Түркиянын президенти Режеп Тайып Эрдоган Москва менен Киевдин ортосундагы туткундарды алмаштыруу маселесин орус президенти Владимир Путин менен талкуулоону кааларын билдирди. Бул тууралуу Украинанын Львов шаарында Украинанын президенти Владимир Зеленский жана БУУнун баш катчысы Антониу Гутерриш менен жолугушуудан кийин өткөн маалымат жыйынында айтты.

«Албетте, жолугушууда Украинанын президенти Владимир Зеленский менен согуш туткундарын алмашуу жана бул багыттагы демилгелерибизди талкууладык. Буга байланыштуу Путин мырза менен орус тарап азыркы жолугушуунун бардык жыйынтыктарына баа берүүнү улантат», - деди ал. Түрк лидери тараптар алмашуу маселесине чоң маани берип жатканын кошумчалады. Ал ошондой эле бул маселени чечүү үчүн Украина менен Орусиянын ортосунда ортомчулук кылууга даяр экенин билдирди.

Бириккен Улуттар Уюмунун баш катчысы Антониу Гутерриш Львовдо Украина жана Түркиянын президенттери менен үч тараптуу жолугушууда Украина көйгөйүн чечүү аракеттерин талкуулап, согуштук аракеттерди токтотуу боюнча конкреттүү сүйлөшүүлөрдү баштоо үчүн дагы көп жол бар экенин айтты. Бул тууралуу БУУнун баш катчысынын орун басары Фархан Хак брифингде билдирди: «Башкы катчы тынчтыктын ишин илгерилетүүгө багытталган аракеттерди талкуулады. Бирок биз согушту толугу менен токтотуу аракеттерин талкуулай турган убактан дагы эле алыспыз», - деп кошумчалады Хак.

Ал белгилегендей, сүйлөшүүлөрдүн жүрүшүндө, атап айтканда, Запорожье АЭСинде жана Еленовкадагы тергөө изоляторунда аткылоо фактыларын аныктоо боюнча МАГАТЭнин миссиясы талкууланды. «Согуштук аракеттерди токтотуу аракети тууралуу айта турган эч нерсе жок. Согуштук аракеттер бүгүн да уланып жаткансыйт», - деди Хак.

Азизбек КЕЛДИБЕКОВ, NazarNews.kg