Айына 28,5 млн. сом чогулткан мектептин директору...

Журналист: NAZARNEWS

26.04.2019, 23:39

26801

коом

Новопавловка айылынын Чыңгыз Айтматов атындагы №1 окуу-билим берүү лицей-комплексинин директору Диляра Абдуллаева кызматтан убактылуу четтетилди. Буга "4500 бала окуган лицейдин жетекчилиги ар бир окуучудан 500-700 сомдон чогултуп, бирок акчанын кайда жумшалганын айтпайт" - деп ата-энелердин нааразы болушканы себеп болду. Чыңгыз Айтматов атындагы №1 окуу-билим берүү лицей-комплексинде 4500 бала үч смен менен билим алат. Ата-энелердин фондусуна, кошумча сабактар жана ысык тамак үчүн ар бир окуучудан 500-700 сомдон чогултулат.

Анын ичинен 1300 окуучу социалдык жеңилдик катары төлөмдөн бошотулган. Ата-энелер бул каражаттын сарпталышы боюнча так маалыматты лицей жетекчилигинен ала албай келишет. Буга нааразы болгон ата-энелер укук коргоо органдарына кайрылып лицейдин алдына митингге да чыгып, отчетту кенен-чонон көрсөтүүнү талап кылууда. Аталган лицейге Новопавловка айыл өкмөтү 2018-жылы 4,3 миллион сом бөлгөн. Ал эми Билим берүү жана илим министрлиги тарабынан жылына канча акча бөлүнөөрү белгисиз.

Булак: "Фабула"