Украинанын президенти Владимир Зеленскийдин Польшада кулаган ракетанын украиналык экенине күмөн санаганы Киев менен Батыш өлкөлөрүнүн ортосундагы пикир келишпестиктерди ачыкка чыгарды. Бул тууралуу The New York Times гезитинин баяндамачысы Карли Олсон билдирди.

"Владимир Зеленскийдин эки карапайым адамдын өмүрүн алган ракеталык окуяга ишенбөөчүлүгү Украина менен анын союздаштары, анын ичинде Вашингтондун ортосундагы коомдук пикир келишпестиктин сейрек көрүнүшүн улантууда", - деп айтылат маалыматта.

Басылманын автору белгилегендей, Зеленский Польшадагы ракетанын кулашына байланыштуу окуяга Киевдин тиешеси жок деп ырастап келет. Бирок анын позициясы АКШ менен НАТОнун ракета Украинанын абадан коргонуу системасына таандык деген билдирүүлөрүнө карама-каршы келет.

15-ноябрда Польшанын маалымат каражаттары Украина менен чек арада жайгашкан дан кургаткычка бир же эки ракета тийгени тууралуу маалымат тараткан. Эки адам каза болду. Польшанын Евробиримдиктеги элчиси Анджей Садос Евробиримдиктин бардык өлкөлөрү ракета окуясы үчүн Орусияны күнөөлөп жатканын айтты.

Орусиянын Коргоо министрлиги ракеталардын кулашына Орусиянын ыктымал мамилеси тууралуу божомолдорду провокация деп атап, өлкөнүн куралдуу күчтөрү Польша-Украина чек арасына жакын жердеги буталарга сокку урбаганына көңүл бурду. Агенттик ошондой эле Польшада табылган ракета сыныктарынын сүрөттөрү украиналык С-300 зениттик-ракеталык комплексинин элементтери экени аныкталганын билдирди.

16-ноябрда АКШнын президенти Джо Байден НАТОго жана G7 өнөктөштөрүнө Польшадагы жарылуу Украинанын абадан коргонуусунун натыйжасы болгонун кабарлады, бул Украинанын президенти Владимир Зеленскийдин снаряд орусиялык экени жөнүндөгү билдирүүсүнө түп-тамырынан карама-каршы келет. 19-ноябрда Ак үй кулаган ракета украиналык экенин дагы бир жолу тастыктады.

Орусиянын БУУдагы Туруктуу өкүлү Василий Небензя да ракетанын кулашына байланыштуу кырдаалда Орусия менен НАТОнун ортосунда түз кагылышуу жаратуу үчүн украин-поляк аракетин көрдү. Анын айтымында, муну Киев режиминин атайылап жалган маалыматы далилдеп турат.

Булак: NazarNews.kg