Азербайжан Тегерандагы элчилигинин ишмердүүлүгүн токтотуп, элчиликтин кызматкерлерин эвакуациялады. Бул тууралуу трт.нет кабарлады.

Учак менен борбор шаар Бакуга кайтып келген Тегерандагы элчилигинин кызматкерлери жана алардын үй-бүлөлөрү Азербайжандын тышкы иштер министринин орун басары Халеф Халефов жана министрликтин өкүлдөрү тарабынан тосуп алынды.

Жума күнү элчиликтин имаратына болгон кол салууда шейит болгон коопсуздук кызматынын башчысы, биринчи лейтенант Орхан Аскеровдун сөөгү ушул эле учак менен Бакуга жеткирилди.

Тышкы иштер министринин орун басары Халефов Тегеран элчилигине жасалган кол салууну террордук акт деп билдирди.

Халефов:«Бул (кол салуу) кабыл алынгыс. Дипломатиялык мамилелер боюнча Вена конвенциясына ылайык, ар бир мамлекет өлкөдөгү элчиликтердин коопсуздугу үчүн жооптуу. Иран табигый түрдө болгон теракт үчүн жоопкерчиликти алат.

Иран өз милдетине ылайык террордук актыны ар тараптуу, кеңири жана ачык иликтеп, кылмышкерлерди жана алардын артында турган күчтөрдү аныктап, аларды жазалашы керек. Бул биздин Ирандан так талабыбыз», - деди.

Окуяны ачыктоо үчүн тиешелүү эл аралык механизмдерди колдонууну пландагандарын айткан Халефов:«Президентибиз Тегеран элчилигин эвакуациялоо чечимин кабыл алды, бирок оор чечим. Бул кайсы бир өлкөдө дипломатиялык ишмердүүлүгүн жана элчиликтин ишмердүүлүгүн токтотуу үчүн жоопкерчиликти талап кылган чечим. Бирок элчилигибиздин кызматкерлеринин коопсуздугун камсыз кылуу жагынан Иранга бизде үмүт жана ишеним жок»,-деп айтты.

Кызматкеринин коңшу өлкөдө шейит болуусуна абдан кайгыргандарын баса белгилеген Халефов:«Тегеран элчилигинин дипломатиялык ишмердүүлүгү толугу менен токтотулду. Имаратты коргоо үчүн 5 адам болот, бирок бул адамдар дипломатиялык ишмердүүлүк менен алектенишпейт. Тебриздеги башкы консулдугубуз ишин улантат», - деп маалымат бөлүштү.

27-январда эртең менен Азербайжандын Тегеран элчилигине жасалган куралдуу кол салууда элчиликтин коопсуздук кызматынын башчысы каза болуп, эки коопсуздук кызматкери жарадар болгону кабарланган.

Иран бийлиги кол салган адам окуядан кийин кармалганын жарыялады.

Азербайжандын Тышкы иштер министрлиги да кол салууну айыптап, Тегеран элчилигинин эвакуацияланарын жарыялаган.

Азербайжандын президенти Илхам Алиев да кол салууну террордук акт катары баалады.