Дүйнөдө коронавирус күчөп жатса биздин гүленчи министрдин окуучуларда эмне өчү бар? Кышкы ызгаар башталганда, дүйнө эли коронавирустун экинчи толкунунан сокку жеп жатканда Билим министри окуучуларды мектептен окута баштады. Оору менен иши жок, Гүленди мактап-жактап жүрүп министрге жеткен Алмазбек Бейшеналиев окуучуларды окутпай бир-аз күтө турса болмок. Суукта коронавирус, грипп күчөйт, бир-аз чыдап онлайн менен окута бериш керек эле.  Класс деген инфекцияны жуктура турган очок болуп саналат. Бир окуучу ооруп калса бир класска жайылтып ийиши мүмкүн. Ошондуктан эмки чейрекке чейин аярлай турушубуз керек эле. Же эмне Кыргызстан дүйнөдөн обочолонуп бөлүнүп калдык беле. Онлайн менен ата-энелер дурус эле окутуп жатышат. Билим берүү жана илим министрлиги ар бир регион боюнча окуу процессин жеткиликтүү деңгээлде уюштурууну кароону сунуштап турганы оң болчу.

Бишкек шаарында  коронавирус боюнча абал курчуса болжол менен 1-10-декабрга туш келиши ыктымал деп мэрдин милдетин аткаруучу Балбак Түлөбаев шаардык кеңештин сессиясында билдирүү жасады. Анын айтымында, учурда баш калаадагы  ооруканаларда коронавируска кабылган бейтаптарга 300гө жакын бош орун бар, эпидемиологиялык абал оору күчөгөн жай айларына салыштырмалуу абал туруктуу, мындан аркы абал кандай өнүгөрү 10-декабрдан кийин белгилүү болмокчу.

«Биз эпидемиологиялык кырдаалдын курчушун 1-10-декабрь деп күтүп жатабыз. Эгер ушул темпте кетсек мындан ары да ушундай темпте кете беребиз деген оюбуз бар. Коронавирус боюнча абал Бишкекте азырынча туруктуу. Июль айында күндө 700-800 бейтап катталып, күндүзгү стационарларга 4500гө чейин кишини кабыл алдык. Бүгүн 90го жетпеген оору чыкты, бир жума мурда 168 болгон. Көрсөткүч төмөндөп баратат»-деди сессияда.

Түлөбаевдин сөзүнө таянсак,  илдет күчөсө №1 оорукана кайра толугу менен коронавирусту дарылоого берилип,  ал толсо №6 оорукана, эгер ал да жетпесе «Семетей» госпиталы ачылат. Ал эми 1,1 миң орундуу «Семетейде» 500-600 орун даяр турат. Июлдагыдай кырдаал кайталанса 20га жакын күндүзгү стационар ачууга даярдык көрүлгөнү да белгилүү болду.

Азизбек КЕЛДИБЕКОВ, NazarNews.kg