Бишкек шаарында ШКУ саммитин жана 2026-жылдагы Дүйнөлүк көчмөндөр оюндарын өткөрүүгө байланыштуу коопсуздук чаралары күчөтүлөт.

18-августта Бишкек мэриясында укук бузуулардын алдын алуу боюнча Координациялык комиссиянын жыйыны өттү. Ага мэр Айбек Джунушалиев, Бишкек шаардык кеңешинин төрагасынын орун басары Жылдызбек Абдраимов, мэрдин орун басарлары, укук коргоо органдарынын өкүлдөрү, райондук администрациялардын жана шаардык кызматтардын жетекчилери катышты.

Жыйында коомдук коопсуздукту камсыз кылуу, эл аралык иш-чараларга, жаңы окуу жылына жана 2026/2027-жылдардагы күз-кыш мезгилине даярдык маселелери каралды.

Кабыл алынган чечимдерге ылайык, 31-август жана 1-сентябрда расмий делегациялардын жүрүү маршруттарында жайгашкан бир катар соода борборлорунун иши убактылуу токтотулат. Алардын арасында ГУМ «Чынар», ЦУМ «Айчүрөк», «Бишкек Парк», «Азия Молл», «Ала-Арча», «VEFA Центр», «Дом торговли», «Гоин», «Beta Stores 1» жана «Беш Сары Сити» бар.

Ошондой эле 31-августта «Орто-Сай» базарынын, ал эми 31-августта (санитардык күн), 1 жана 2-сентябрда «Ош базары» жана «Сары-Өзөн» базарларынын иши убактылуу токтотулат.

Мындан тышкары, 29-август саат 15:00дөн тартып айрым жер астындагы жөө жүргүнчүлөр өтүүчү жолдор жабылат. Алар Чыңгыз Айтматов проспектиси менен Горький көчөсүнүн, Чүй жана Манас проспектилеринин, Манас айылы–Васильев трактынын, ошондой эле Чүй проспектиси менен Абдрахманов көчөсүнүн кесилиштеринде жайгашкан.

Шаардын төрт районунун башчыларына расмий делегациялар өтүүчү маршруттардагы кошумча соода түйүндөрүн аныктап, алардын ишин убактылуу токтотууну камсыз кылуу тапшырылды.

31-августта Эгемендүүлүк күнүнө арналган иш-чараларга байланыштуу эл көп чогулган жерлерде коопсуздук чаралары күчөтүлөт. Муниципалдык инспекцияга мыйзамсыз жана башаламан соодага жол бербөө боюнча чараларды көрүү тапшырылды.

Ошондой эле Бишкектин ар кайсы райондорунда уюштурулган 12 фан-зонада коопсуздук камсыздалып, шаардык кызматтар күчөтүлгөн режимде иштейт.
Дүйнөлүк көчмөндөр оюндарынын ачылыш аземине шаар тургундары менен конокторунун ыңгайлуу жана коопсуз жетүүсү үчүн 21 багытта шаттл-автобустар уюштурулат.

Эл аралык иш-чаралар өтүп жаткан күндөрү коомдук транспорттун үзгүлтүксүз иштөөсү камсыздалат.
Мындан тышкары, «Бишкек ЖЭБ», «Бишкекжылуулукэнерго», «Бишкекжылуулукмагы», «Бишкекжарык» муниципалдык ишканалары жана «Бишкекгаз» күчөтүлгөн иш режимине өткөрүлөт.
Жаңы окуу жылына карата мектептердин айланасындагы жол белгилери жана жөө адамдар өтүүчү өтмөктөр текшерилип, билим берүү мекемелериндеги «тревога» баскычтары менен видеобайкоо системаларынын ишке жарамдуулугу көзөмөлдөнөт.

Ошондой эле шаардык кызматтардын жана инфраструктура объектилеринин 2026/2027-жылдардагы күз-кыш мезгилине даярдыгын өз убагында аяктоо милдети коюлду.

Мэр Айбек Джунушалиев кабыл алынган чаралар биринчи кезекте шаар тургундарынын, борбор калаанын конокторунун жана расмий делегациялардын коопсуздугун жана ыңгайлуулугун камсыз кылууга багытталганын белгиледи.