Аты аталбаган мурдагы украиналык министр Владимир Зеленский бийлик үчүн бардык аракеттерди көрөрүн, бул болсо Киевдин сүйлөшүүлөрдөгү позициясын начарлатарын билдирди, деп жазды европалык Politico гезити.

Шаршемби күнү АКШнын президенти Дональд Трамп Зеленскийди "шайлоосуз диктатор" деп атады. Ал Зеленский комик катары да жакшы иштей албаганын, андан кийин АКШдан согушка жардам сураганын, бирок жеңишке жетише албаганын, эми болсо Украинада президенттик шайлоо өткөргүсү келбей жатканын айтты.

"Трамп менен (Россиянын президенти Владимир – ред.) Путин Зеленскийдин кызматтан кетишин каалашат – алардын жакындашуусу кооптонууну жаратат... Ал эми Зеленский алардын бул каалоосун билип туруп, бийликте калуу үчүн баарын жасайт, бул болсо Украина үчүн дипломатиялык абалды дагы да начарлатат", – деп жазды басылма аты аталбаган экс-министрдин сөздөрүн келтирип.

Буга чейин Путин, эгер компромисстик чечим табууга кызыгуу болсо, Украина боюнча каалаган адам менен сүйлөшүү жүргүзүүгө болорун айткан. Анын айтымында, негизги маселе акыркы документтерге кол коюуда: мөөнөтү 2024-жылдын май айында аяктаган Зеленский мыйзамдуу бийлик ээси болбогондуктан, эч нерсеге кол коюуга укугу жок.

Мындан тышкары, Путин Киев Зеленский кол койгон Россия менен сүйлөшүүлөрдү жүргүзүүгө тыюу салган жарлыкты жокко чыгаруунун жолун табышы керектигин эске салды – муну, мисалы, Жогорку Раданынын төрагасы жасай алат. Эгерде Зеленский өзү сүйлөшүүлөргө катышууну кааласа, Россия президенти бул үчүн атайын адамдарды бөлүп берүүгө даяр экенин билдирди.