Бүгүн, 20-майда Жогорку Кеңештин жыйынында өкмөткө караштуу Айлана-чөйрөнү коргоо жана токой чарба агенттигинин жетекчисинин орун басары Элдияр Шерипов депутат Махабат Мавлянованын суроосуна жооп берип жатып, Бишкектин абасын көбүнчө автоунаалар булгап жатканын билдирди.

«Абанын булганышына менчик мончолордун да таасири бар. Мындан тышкары абаны 13-14% Бишкек Жылуулук электр борбору булгай турганы белгилүү», - деди Элдияр Шерипов.

Жыйында Руандада 2016-жылдын 15-октябрында кабыл алынган «Озон катмарын бузуучу заттар боюнча Монреаль протоколуна киргизилген түзөтүүнү ратификациялоо жөнүндө» мыйзам долбоору экинчи окууда каралып, добуш берүүгө жөнөтүлдү.

Булак: NazarNews.org