Кыргызстан мусулмандарынын дин башкармалыгы имам Садыбакас Дооловдун чуулгандуу билдирүүсүнө байланыштуу иликтөө иштерин жүргүзүүдө. Бул тууралуу муфтияттан билдиришти.

Анын айтымында, Садыбакас Доолов Бишкектин Свердлов районунун башкы имамы.

"Кыргызстан Мусулмандарынын дин башкармалыгы Садыбакас ажы Дооловдун айткандары боюнча тактоо иштерин жүргүзөт жана видеодогу сөздөр кандай максатта айтылгандыгын териштирет”, — деп айтылат билдирүүдө.

Эске салсак, Садыбакас Доолов эттин кымбатташына өлкөдөгү аялдарды айыптаган. Ал муну аялдардын ылайыксыз, кыска көйнөк кийингени үчүн деп эсептеп, эркектерди «ушул шермендечиликти токтотууга» үндөгөн. Аталган билдирүү социалдык тармактарга тарап, коомчулук арасында түрдүү сын-пикирлер айтылууда.

Булак: NazarNews.kg