Парламент партиялык тизмеси аркылуу аркылуу жөндөлүп баштагандан тарта бир топ адам де­путат да болуп, ошол эле маалда айрымдары депутаттыктан кетип да үлгүрүп атышат. Дегеним, Жогорку Кеңештин КСДП фракциясынын депута­ты Тилектеш Исаев мандатын тапшырып, жылуу ордунан кол жууду. Эми анын ордуна тизме боюнча Канат Керезбеков деген илим изилдөөчү келиши күтүлүүдө. Эсиңиздерге сала кетсек, Канат мырза Кыргыз Республикасынын өкмөтүнө караштуу Юридикалык академиянын ректору болуп эмгектенип келген.

Артына камчы салдырбаган жигиттердин бири экени айтылып келет. Ырасында Канат мырза илим жаатында эле ийгиликке жетишпестен, жаш болсо да рефармотор катары кеңири таанымал. Жетекчилигиндеги Юридикалык академияны өлкөбүздүн алдыңкы гана окуу жайы эмес, эл аралык абройго дейре көтөрүп, заманбап билим берүү ситемасы менен айкалыштырганы бар. Ушу тапта келечек ээлери «Мен Юридикалык академиядан билим алам же ошол окуу жайды бүткөм» деп сыймык менен айта алышат. Мындайча айтканда, Керез­беков билим берүү жаатында анык реформа жасап коё алган. Демек балык депутаттардын тизмегине илинбей, калыстыкты айтып карсылдаган эл өкүлдөрүнүн катарын толуктайт деп ишенсек болчудай.

Анүстүнө мыйзамды семичкедей чаккан Керезбеков өңдүү депутаттар мыйзам чыгаруу жаатына суудай керек экенин коомчулук дагы моюндайт. Болбосо чала сабат, ой-зээни тайкы депутаттарды бага берип эл деле жадады. Анан да Канат мырза өзүн көрсөтө турган мезгил келди десек жаңылышпайбыз.

Булак: “Мантыш”