Кыргызстандын азыркы министрлер кабинетинде бир нече жылдан бери кызматын сактап келе жаткан жетекчилер бар. Эң узак убакыттан бери бир эле кызматта иштеп жаткан министр – Ички иштер министри Улан Ниязбеков.

Ниязбеков ИИМди 2020-жылдын 14-октябрынан бери жетектеп келет. 2026-жылдын августуна карата анын бул кызматтагы үзгүлтүксүз иш стажы 5 жыл 10 айга жакындады. Бул аралыкта өкмөттүн курамы бир нече ирет жаңыланып, көптөгөн мамлекеттик органдарда жетекчилер алмашкан.

Экинчи орунда Юстиция министри Аяз Баетов турат. Ал министрликти 2021-жылдын октябрынан бери жетектеп, кызматта дээрлик 4 жыл 10 ай болду.

Данияр Амангельдиев да өкмөттөгү узак мөөнөт иштеген жетекчилердин катарында. Ал 2021-жылдын октябрында Экономика жана коммерция министрлигин жетектеп, 2024-жылдын декабрында министрлер кабинетинин биринчи орун басарлыгына дайындалган.

Тышкы иштер министри Жээнбек Кулубаев бул кызматта 2022-жылдын апрелинен бери иштеп келет. Анын стажы 4 жылдан ашты.

Ал эми министрлер кабинетинин төрагасы Адылбек Касымалиев 2022-жылдын июнунан бери өкмөттүн жогорку жетекчилигинде иштеп келет. 2024-жылдын декабрынан тартып министрлер кабинетин жетектөөдө.

Билим берүү министри Догдуркүл Кендирбаева бул кызматка 2023-жылдын күзүндө келген. Анын министр катары иштегенине азырынча үч жылга жете элек.

Көпчүлүк министрлер кызматка жакында келди.

Азыркы министрлердин басымдуу бөлүгү 2024–2026-жылдары дайындалган. Айрым министрликтерде жетекчилердин курамы өзгөчө 2026-жылы олуттуу жаңыланган.

Ошентип, бүгүнкү күндө министрлер кабинетинде төрт жылдан ашык убакыттан бери жогорку кызматта турган негизги жетекчилер – Улан Ниязбеков, Аяз Баетов, Данияр Амангельдиев, Жээнбек Кулубаев жана Адылбек Касымалиев.

Бирок алардын ичинен бир эле министрликти үзгүлтүксүз жетектеп келе жаткан башкы «кадрдык узак жашоочу» - Улан Ниязбеков.

Эң көп министр алмашкан тармак – Саламаттык сактоо министрлиги.

Ал эми жетекчиси эң көп алмашкан министрликтердин бири – Саламаттык сактоо министрлиги. 2021-жылдын майынан 2026-жылдын 20-августуна чейин бул ведомстводо министрлик кызматында беш жолу алмашуу болуп, жалпы алты министр иштеген.

Бул кызматты кезеги менен Алымкадыр Бейшеналиев, Гүлнара Баатырова, кайрадан Алымкадыр Бейшеналиев, Эркин Чечейбаев, Каныбек Досмамбетов жана Дамирбек Осмонов жетектеген. Каныбек Досмамбетов министрликте эң кыска убакыт – болгону эки айдай иштеген. 

Ошентип, кыргыз өкмөтүндө айрым жетекчилер бир кызматта жылдап иштеп жатса, айрым министрликтерде кадрдык өзгөрүүлөр тез-тез болуп турат.

Маалымат булагы 24 kg