Негизги дүйнөлүк державалар жана БУУнун Коопсуздук Кеңешинин туруктуу мүчөлөрү катары Кытай менен Россиянын глобалдык стратегиялык туруктуулукту сактоодо жана глобалдык өнүгүү менен прогресске көмөктөшүү боюнча маанилүү милдеттери бар. Бул тууралуу 18-сентябрда Кытай Эл Республикасынын тышкы иштер министри, КПК Борбордук Комитетинин Тышкы иштер комиссиясынын аппарат жетекчиси Ван И РФнын тышкы иштер министри Сергей Лавров менен Москвадагы өткөн жолугушууда айтканын NazarNews маалыматтык агенттигине кытайлык CCTV plus агенттиги билдирди. 

Ван И белгилегендей, Кытай менен Россия көз карандысыз тышкы саясат жүргүзүп, алардын эки тараптуу кызматташуусу эч бир үчүнчү тарапка каршы багытталган эмес жана үчүнчү тараптардын кийлигишүүсүн кабыл албайт. Бир тараптуулуктун, гегемонизмдин жана блоктук тирешүүнүн күчөп бараткан шартында Кытай менен Россия замандын духун ээрчип, чоң державалар катары жоопкерчиликти өзүнө алышы керек, эл аралык милдеттенмелерди туура аткарып, чыныгы көп тараптуулукту карманышы керек.

Ал ошондой эле эки тарапты дүйнөдө көп тараптуулукту илгерилетүүгө жана стратегиялык координацияны бекемдөө аркылуу глобалдык башкаруунун өнүгүүсүн адилеттүү багытка түртүүгө чакырды.

Өз кезегинде Сергей Лавров украин кризиси боюнча өз пикирин билдирип, Кытайдын бардык тараптардын коопсуздук кызыкчылыктарын эске алган жана чыр-чатактын түпкү себептерин жоюуга жардам берген позициясын жогору баалайт. Анын айтымында, Россия сүйлөшүүлөргө жана диалогго ачык бойдон кала берет.

Тараптар ошондой эле эки тарапты кызыктырган башка эл аралык жана аймактык маселелер боюнча пикир алмашып, өз позицияларын координациялашты.

Булак: NazarNews.kg