АКШда полиция кызматкерлери тарабынан кыйноо жолу менен өлтүрүлгөн Жорж Флойддун аялы Рокси Вашингтон күйөөсүнүн өлүмүнөн кийин билдирүү жасаганын, чет элдик басылмалар жазышууда.

Анын айтымында, Жорж экөөнүн ортосунда 6 жаштагы Жианна аттуу кызы бар жана атасы кызын аябай жакшы көрчү. "Ал кызынын кандай чоңойгонун, мектепти бүтүргөнүн эч качан көрбөйт. Кызыма атасы керек. Тилекке каршы атасы эми жок. Мен адилеттүүлүктү каалайм. Ким кандай ойдо болбосун, Жорж абдан жакшы адам эле. Жолдошумду өлүмүнө себеп болгон 4 полиция кызматкери жазаланышы зарыл", - деди маркумдун аялы Вашингтон.

Эске салсак, 25-майда теги африкалык болгон Жорж Флойддун полиция кызматкерлери тарабынан кыйноо жолу менен өлтүрүлгөндөн кийин АКШда нааразычылык акциясы күч алууда. Башаламандыктан улам 20дан ашуун адам каза болуп, 5 миңге чукул киши кармалган.

Булак: NazarNews.kg