Бишкек мэриясы №67 мектептин карантинге жабылганына байланыштуу учурда кадимки тартипте билим алып жаткан балдардын ата-энелерине кайрылуу жасады. Бүгүн бул мектеп-гимназиянын эки окуучусу менен бир мугалиминен коронавирус табылганы айтылып, мекеме эки жумага карантинге жабылганы кабарланган.

"Урматтуу ата-энелер, балдарыңыздардан сасык тумоонун белгилери же ооруган адамдар менен байланышта болгонун байкасаңыздар мектепке жана бала бакчага жибербей, үйдө калтырууну суранабыз. Эгер ооруп калышса, күтпөстөн дарыгер чакырыңыздар. Мектептеги жана мектепке чейинки балдар коронавирустун алып жүрүүчүсү болуп, башкаларга жуктурушу мүмкүн", — деп айтылат маалыматта.

Муниципалитет ооруп жаткан жарандарды карантиндик режимди сактоого чакырды.

Булак: NazarNews.kg