NazarNews.kg маалымат агенттиги коомдук ишмер Мурат Жетимишбаев менен кечээги Атамбаевдин маегинде айтылган айрым жагдайлар тууралуу сүйлөштүк.

-Мурат мырза, экс-президент Алмазбек Атамбаев кечээги өзүнүн телеканалына берген маегинде өз чындыгын айттыбы же эл алдында актанууга аракет кылдыбы?

-Атамбаев өз маегине моокуму канып, “көк буумуду” чыгарып алдым, “талкаладым, жайладым”,- деп өзүнө өзү ыраазы болгон, болбогондугун билбейбиз. Бирок “эки дөөнүн” чабышын эңсеп, “ох жарко” болот деп, алаканын ушалап отургандардын “көксөөсү” суубай калгандыгын ачык эле байкоого болот. Дыкат тандалып берилген суроолорго, өзүнүн ою боюнча “дакат даярдалган” жоопторун берди. Мында Атамбаев мурункудай “от алып кеткенде” буркан-шаркан түшүп, сөөмөй кеземейин көрсөтпөй, бир аз токтоо көрүнгүсү келгени менен, ал мурунку сүйлөө манерасынан эч жазган жок. Кечээги маегинде баякы эле; фактылардан кайпалаңдап үстүртөдөн өтүп кетүү, өзүнүн мурунку тизгиндештеринин адамдык абройуна шек келтирүү, калп эле кейимиш, боорукер болумуш, өзүнүн тазалыгын кайра-кайра бышыктоо жана башка нерселер орун алды.

Убакыт деген убакыт, Атамбаев өзүнүн кетирген каталарын ачык моюндагысы келбегени менен, көкүрөгүнүн ары түпкүрүндө, көп өкүнүчтүн үшкүрүгү ачык эле байкалып турду. Ал эми актануучулук боюнча айта кетсек, негизи ал дайыма ар-кандай чоң резонансту иштер боюнча: ошол эле “Русгидро”, “Лигласс”, ТЭЦ. Батукаев, өзүнүн саясый каршылаштарын кугунтуктоолору боюнча, дайыма актанып келген жана кечээ да абдан актанды. Айрыкча Албектен, үй салганга жер сатып алгандыгы жөнүндөгү “мен жер кимдики экендигин такыр билген эмесмин, ата бабам тиккен бактардын жанында болгум келди”,- деген сыяктуу осол актануулары аргасыздан барыбызга Эзоптун жылмайуусун тартуулап “сокурга, бир сокур келип ай шордуу экенсиң!”, - дегендей эле болду...

-Алмазбек Атамбаев өз сөзүндө эмнегедир  Сооронбай Жээнбековду “Бакиевдин жолуна түштү”- деди. Сиз Сооронбай Жээнбековдун аракетинен Бакиевдердин жолуна түшкөн, түшпөгөнүн   байкай алдыңызбы?

- Атамбаев, «Жээнбеков, Бакиевдин жолуна түшүп кетти деп кайра-кайра бышыктаганы ал, Бакиевдин кайсы жолун айтып жатканын чыны билбейт экенмин! Бирок канчалык деңгээлде аны сындабайлы, чындыгында экономиканы алга жылдыруу жана кадр саясаты боюнча Бакиевдин аракеттери Атамбаевдикинен алда канча жогору жана сапаттуу болчу. Эгерде Жээнбеков ушул кадар саясаты менен экономиканы көтөрүү боюнча Бакиевдин жолуна түшсө анын эмнеси жаман! Албетте, Бакиевдин эң чоң күнөөсү, ал баласына ашыкча ишеним артып, мамлекеттик өтө орчундуу иштерди ишенип берип койгондугунда. Эстесеңер, Атамбаев жаңы бийлике келгенде “көрөсүңөр, алты айдан кийин Кыргызстанды өнүккөн мамлекетке айлантабыз!”,- деген убада менен келген.

Анан эмне болду? Азыр биз көрүп отургандай “кокуй” менен “алат” болду! Башканы кой, так өзү деле экономика жаатында так ошол Бакиевдин жолуна түшүп анын командасы же “баласы” негиздеп кеткен, Нарын каскадына ГЭС куруу, “Датка –Кемин” чордону, Бишкек ТЭЦ ремонттон өткүрүү проектилерин ишке ашырууга киришпеди беле. Жыйынтыгы кандай болгондугун жакшы билебиз. Бул боюнча: бир эле мисал Бишкеке ТЭЦ ремонтто боюнча Бакиевдин убагында макулдашылган 150 миллион долларга түзүлгөн проектини 286 миллион долларга чыгарып, болуп көрбөгөндөй жемкорлука жол бергендиги жалганбы? Чындыгында азыр меселенин баары Жээнбековдун кайсыл жолго түшүп, кимдин жолун туурап бара жатканында эмес!

Маселе, Атамбаевдин кыялындагы “бийликти колдон чыгарбоо” проектиси ишке ашпай, азыркы Ажобуз мамлекетти башкарууда чечкиндүүлүк менен эч кимге көз карандысыз, жолду тандап алгандыгында. Орустар айткандай, “вот где собака зарыта!”. Кандай кылганда да, президент Жээнбеков эң туура жолду, жемкорлор менен, болгонда да мурунку кээ үзөңгүлөштөрүнө каршы катуу күрөштү тандап алгандыгында. Чындыгында биз дагы пенде катары, Президентке бул күрөш канчылык оор болуп жаткандыгын билип койгонубуз да абзел! Дагы баса белгилеп кете турган жагдай бул, мурунку кыргыздын саясатчы экс-жетекчилери менен ачык жолугушуп, ачык пикир алышканы керемет болду! Мына так ушундай кадамдардын аркасында Ажо азыр калың элдин колдоосуна ээ болуп турат. Эл Жээнбековдон дагы чечкиндүү кадамдарды күтүп үмүт артып турат! Сөздүн кыскасы; Хан бирөө болуп, Эл тирөөч болуп, берсек ынтымак ырыс сөзсүз келээрине ишенели!

Булак: NazarNews.kg