Орус армиясы Киев жана Чернигов шаарларында “аскердик активдүүлүгүн кескин кыскартуу” чечимин кабыл алды. Бул тууралуу 29-мартта ТАСС агенттиги Орусиянын коргоо министринин орун басары Александр Фоминге шилтеме берүү менен билдирди.

Аскердик активдүүлүктү кыскартуу жөнүндө билдирүү жаатташкан тараптардын Стамбулдагы жолугушуусунан кийин жасалды. Фомин – орус делегациясынын мүчөсү. Орусия тараптын өкүлү Владимир Мединский Москва чыңалууну жоюу үчүн “эки кадам жасап жатканын” билдирди.

Анын алдында Орусиянын коргоо министри Сергей Шойгу тараткан билдирүүдө Украинадагы аскердик операциянын биринчи баскычынын негизги максаттары ишке ашканы маалымдалган. Ал Орусия украин армиясын Донецк жана Луганск облустарынын сүрүп чыгууга ыкылас койгонун белгилеген.

Аскердик активдүүлүктү кыскартуу жөнүндөгү билдирүү украин тарап Киев алдындагы контрчабуулу ийгиликтүү болгонун жарыялагандан кийин болуп жатат.

Орусия Чернигов шаарын курчоого алганын билдирген, бирок көз карандысыз булактар бул чындыкка дал келбей турганын айтышкан.

29-мартка карата Москва Донбасста гана аскердик активдүүлүгүн улантты. Анын ичинде жикчилдер менен бирге стратегиялык маанилүү порт болгон Мариуполь шаарына сокку урууну да токтоткон жок. Согушка чейин калаада 430 миң киши жашаган.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн «Украинаны демилитаризация жана денацификация» жасап жана Донбасстагы «жай жашоочулардын канына забын болгондорду» аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg