Ысык-Көл облусунун башчысы Асхат Акибаевдин ишиндеги чалмакейлер күн сайын ачыкталууда. Буга дейре «Кепилдик» фондун түзө коюп, облустагы аким-мэрлерди кыйноого алса, эми өзүнүн орун басарларынан кутулууга аракет жасаш үчүн борбордук бийликке аларды жамандаганы ачыкталабы? Кезегинде Жусупбек Шарипов Ысык-Көл облусунун губернатору кезинде көздөй жардамчысы болгон Дамир Моңолдоровду Сооронбай Жээнбеков өкмөт башына келер замат агасынын амири астында губернатордун 1-орун басарлыгына дайындаганы бар.

Дал ушул Моңолдоровду Акибаев өзүнүн 1-орун басарлыгынан Ысык-Көл акими кылууга ашыкса, буга ачууланган Дамир «арыз-муңун» Жээнбековдорго айтып, губернатордун өзүн кызматтан чаап түшүрүүгө аракет кылганы каңкуланууда. Анан калса мыйзам аркылуу күчү бекемделе элек «Кепилдик» фонддун ишин аким-мэрлердин колу менен жасоого кылган аракетинен майнап чыкпай «расса» кыйналганы, акыры Сапар Исаковдун атын сатып, кол алдындагыларды коркутууга өткөнү кандай? Бир кездери Максим Бакиевдин командасындагы 12 баланы «Ысык-Көлдү өнүктүрүү» фондуна алып барып, кызмат караштырып жатса, Мирбек Кожоев менен Досубек Касмалиев аттуу (экөө тең экс-губернатор Кыдыкбек Исаев менен Эмилбек Каптагаевдин көздөй кадрлары) «сүйгүнчүктөрү» менен облустук бийликке интрига кылып жатышкандары чынбы? Асхат Акибаевдин мындай «өнөрлөрү» тууралуу Сапар Исаковго туура маалыматгар жетсе, бул ноён дароо кызматынан шыпырылабы? Түз жолдо келе жаткан Сапарга деле атын булгаган жандоочтордун кереги жок да, туурабы?

Ийгилик Болсунбаев

Булак: “АЗИЯnews”