Россия Федерациясынын президенти Владимир Путин сентябрь айында Кытайга расмий сапар менен барып, милитаристтик Япониянын үстүнөн жетишилген жеңиштин 80 жылдыгына арналган салтанаттарга катышат.

Бул тууралуу “Интерфакс” агенттиги кабарлады. Мындай кабарды Россиянын Коопсуздук кеңешинин катчысы Сергей Шойгу шейшемби күнү Кытай Коммунисттик партиясынын Борбордук комитетинин Саясий бюросунун мүчөсү Чэнь Вэньцин менен жолугушууда билдирген.

«Биз эки тараптуу кызматташууну, эл аралык аренадагы стратегиялык өз ара аракеттенүүнү Россия менен Кытайдын өнөктөштүгүнүн эң маанилүү элементтеринин бири катары карайбыз», — деди ал.

Мындан тышкары, Шойгу Россия менен Кытайдын тышкы саясаттагы кызматташтыгын “дүйнөлүк иштердеги негизги туруктуулукту камсыздоочу фактор”,-  деп атады.

В. Путиндин Пекинге сапары Кытайдын президенти Си Цзиньпиндин Москвага болгон май айындагы сапарына жооп катары уюштурулууда.

Салтанаттар 2025-жылдын 3-сентябрында өтүп, Кытайда “Жапон агрессиясына каршы күрөшүүдө жетишилген жеңиштин күнү” катары белгиленет. Бул иш-чарада аскердик парад жана башка расмий иш-чаралар өткөрүлүшү күтүлүүдө .

Бул сапар Россия менен Кытайдын ортосундагы стратегиялык өнөктөштүктү мындан ары да бекемдөөгө багытталган. Май айында Москвада өткөн Жеңиш күнүнүн салтанатында эки өлкөнүн лидерлери биргелешкен билдирүү жасап, АКШнын “бир тараптуу санкцияларын” жана “гегемониялык аракеттерин” сынга алышкан.

Ошондой эле, алдыдагы сапар эки өлкөнүн ортосундагы экономикалык жана аскердик кызматташтыкты тереңдетүүгө өбөлгө түзөт. 2024-жылы Россия менен Кытайдын ортосундагы соода жүгүртүүсү 237 миллиард долларга жеткен.

Путиндин Кытайга болгон сапары эки өлкөнүн ортосундагы тарыхый байланыштарды эскерүү жана келечектеги кызматташтыкты талкуулоо үчүн маанилүү мүмкүнчүлүк болуп саналат.

Булак: "eurasiatoday.ru"