2010-жылдан кийин саналуу гана адамдардын жылдызы бийликтен жанса, алардын сап башында Жогорку Кеңештин азыркы төрагасы Чыныбай Турсунбеков тураары талашсыз. Революцияга чейин Чыныбай Акуновичтин аты саясатта такыр угулчу эмес, бизнес чөйрөсүндө гана айтылып келген. Аны Кыргызстандагы бизнестин ун тармагын көзөмөлгө алган монополист катары тааныган. Ошондон улам саясатка аралашып, таасирдүү фигурага айланганда «тегирменчи» деген ылакап ат коюп алышкан. Азыр Чыныбай Турсунбеков тажрыйба топтоп, кадыр-барк күтүп, салмактуу саясатчыга айланып калган чагы. Өлкөдөгү эки кишинин бири болгон Турсунбеков тууралуу карапайым калк кандай ойдо болду экен? Бул дагы кызык.

Кутман Маматазимов, журналист:

— Турсунбековду саясатчы катары баалайм. Көпчүлүк саясатчылардай интрига жаратып, жасаган-эткен иштерин мактанып, өзүн рекламалабайт. Албетте шайлоо учурунда партия үчүн чуркагандыр. Парламенттин башында туруп, 120 мээни башкарып, аларды системадан чыгарбай алып отуруу деле кыйын. Жалпылап алганда учурдагы саясатчыларга салыштырмалуу өз ишин билген мыкты ишмер.

Жайна Мусабекова, студент:

— Мен Турсунбековду тигил ишти жасады же ошол кишинин долбоорунун алкагында мындай иштер жасалып жатат деп уккан деле жокмун, көрбөй деле турам. Бул кишинин мыкты бизнесмен болгонун, завод- фабрикалары бар экенин билебиз. Демек бул киши байлыктын күчү менен бийликке жетти десек да туура болчудай. Өзүңүздөр көргөндөй азыр баарын акчага сатып алып калышпадыбы. Жеке эле Турсунбеков эмес жалпы эле учурдагы парламентте отургандар жалаң акчалуу бизнесмендер экени даана байкалды. Эми кантмек элек башка түшкөндү көрөбүз да.

Токсон Анаркулов, таксист:

— Мен бул кишини саясатчы катары көрө албайм. Маселен бул киши өз көмөчүнө чок тартканды жактырат окшойт. Ушул мезгилге чейин мындайды көрбөдүм эле, депутаттар сүйлөп бүткөнчө эле убакытты өчүрүп салып СДПКдан бирөө сүйлөп, оппозициядагылардан кемип баратса болуша коёт. Ушундай кантип спикер болсун? Ошентип ар нерсе болуп жатып, өзүнүн партиялаш депутаттары тоотпой жатканын көрүп эле жатабыз. Спикер деген баардык депутаттардын пикирин сыйлап, нейтралдуу позицияны сакташ керек да. Ал жерге өз партиялаштарына жан тартсын деп отургузган эмес болуш керек.

Дамирлан Калмаметов,   соодагер:

— Чыныбай Турсунбековду мыкты саясатчы катары андай-мындай деп деле айта албайт экенмин. Салыштырып айтканда дурус эле киши. Бирөөнүн ишине кийлигишпейт. Атың чыкпаса жер өрттө дегендерден алыс, ишин мыкты алып барып жатат. Мына жоон топ депутат министрлерди баштап алып карапайым калк менен баарлашып, ал- акыбалдарын сурап турат. Жакында ошол спикерликке отургандан тарта бир аз терс пикирлер айтылып жүрөт. Эми пенде болгон соң кээде адашат деле экенсиң. Ал киши деле регламент боюча иш алып барып жатат.

Шатман Бөрүев, соодагер:

— Негизи эле азыркы саясатчыларды эч жактап сүйлөгүм жок. Айла жок оюңду айткың келет да. Учурда саясатчылар элди таптакыр унутта калтырышты. Сиз айтып жаткан Чыныбай Турсунбеков деле эмне иш кылып жатканын билбейм. Байкуш эл өзүнүн киндигин өзү кесип, көр оокатын өткөрүп жатат. Трибунада туруп алып эле, бири-бирин чукуп, байлыктарын санатышпай, элге жардам берип, көйгөйлөрдү чечип берсе жакшы болот эле. Бажы союзуна кире коюп эмне гана күндү көрүп атабыз? Анан элди алаксытыш үчүн ар кандай шоуларды таба койгонун кантесиң булардын. Элдин аң-сезими өсүп, баягы караңгы кыргыз деп ойлоп жүрүшөт окшойт. Тынч эле болсо болду.

Бакыт Бакетаев, саясий серепчи:

— Чыныбай Акунович Кыргызстандагы эң күчтүү саясатчылардын бири. Күчтүү дипломат. Азыркы кырдаал Чыныбай мырзага окшогон саясатчыларга муктаж.

Кудурет Абдувалиев:

— Чыныбай Турсунбеков мыкты саясатчы. Аны өзүңүздөр деле байкап атсаңыздар керек, кайсыл жерде кандай окуя болбосун биринчилерден болуп элдин абалы менен таанышып келет. Бизге негизи Турсунбеков мырзадай 50 депутат болсо жетиштүү болмок. Айтайын дегеним, бул киши баардык жагынан карапайым адамдарга пайда алып келчү иштерди алып барууда. Сүйлөгөн сөздөрүндө жан бар.

Кошой Бакиров, соодагер:

— Менин оюмда ал киши акыркы кездерде бир аз өзүнүн партиялаштарына тартып жаткансыйт. Өткөндө парламенттик берүүнү көрүп отурсам депутаттар сүйлөп бүткөнчө эле убакыт бүтүп калып, ал адамдардын ортосунда кайым айтышуулар да болуп кеткенсиди. Негизинен бул кишини «Акун» компаниясы аркылуу жакшы тааныйм. Ал эми саясатчы катары чынында башкаларга салыштырмалуу тажрыйбасы көп эмес. Алдыңкы мыкты он саясатчынын катарына кирем десе саясаттын казанында дагы бир топ жыл кайнаш керек. Бир өзгөчөлүгү курсагы ток, токочтуу адам. Ошондуктан башкалардай болуп алдым-жуттум эмес экени жагат.

Даярдаган  Үсөн АБДИРАШИТ уулу

Булак: "Жаңы ОРДО"