Мурдаагы күнү, 5-июлда, шаардык сот «Акнет» компаниясынын президенти Кубан Ажимудиновду кайрадан камакка алуу тууралуу чечим чыгарды. Райондук сот аны 9-июнда үй камагына бошоткон жана дароо анын жүрөгүнө операция жасалган. Сотко ал тууралуу справка берилди, прокурор болсо – медициналык корутунду талап кылды, бирок Ажимудинов ооруканада жатат, ошондуктан корутунду чыга элек.

2019-жылы Ажимудинов салык боюнча камакка алынган, бирок каралып жаткан иш – такыр башка. 2020-жылдагы октябрь окуяларынан кийин Ажимудинов 6-октябрда үй камагына чыгарылган, үйүнүн ачкычы жок болгондуктан ал ачкыч алайын деп «Акнетке» барган, бирок компанияны мурда рейдерлик жол менен басып алгандар аны – рейдерлик кылууга аракеттенген деп күнөөлөгөн.

Өкмөт 2018-жылы бекиткен оорулар менен ооругандарды камакта кармабаш керек, Ажимудовдун оорулары ошол тизмеге кирет, бирок сот баары бир аны камакка алуу чечимин кабыл алды. Ал соттордун аттары – Жамиля Сабитова, Сүйүнбек Бекташев жана Улан Садырбеков. Кыргызстандын түбүнө адилетсиз соттор жете тургандай.