Профессор Сулайман Кайыпов: Топчубек Тургуналиевдин 2016-жылы чыккан «Байыркы көчмөн кыргыз цивилизациясы» деген китеби тууралуу коомдо жана илимий чөйрөдө жетиштүү талкуу болбой жатат, чындыгында болсо, деги эле кыргыз цивилизациясы тууралуу көлөмдүү эмгек жаратып, Топчуке илимде жаңы сөз айтып, илимге жаңылык киргизди. Тургуналиевдин саясий да, илимий да эмгектери коом менен мамлекет тарабынан жетиштүү деңгээлде баалана элек десе болот.

«Манас» эпопеясы өзү эле жогорку маданият гана жарата ала турган мисал жана андай феномен жетиштүү деңгээлге чейин өнүккөн цивилизацияда гана боло алат. «Манастын» мисалында Топчуке – аскерий, өндүрүштүк, маданий, саясий өнүгүү жетишкендиктерин келтирип, ар башка хандыктардын адилет конфедерациясы түзүлгөнүн жана аны башкарууда меритократия принциптери колдонулганын дагы көрсөткөн...