Япониядагы эмгек күчүнүн тартыштыгы олуттуу экономикалык кыйынчылыктарга алып келди.

Бул тууралуу Reuters ОЭСРдин (Экономикалык кызматташтык жана өнүктүрүү уюму) маалыматтарына таянып билдирди.

ОЭСРдин маалыматына караганда, өлкөдөгү эмгекке жарамдуу калктын саны 1995-жылдагы эң жогорку көрсөткүчтөн бери 16% кыскарган. Бул кадрлар үчүн катуу атаандаштыкты пайда кылды: жапон компанияларынын үчтөн экиси кызматкерлердин тартыштыгы алардын бизнесине олуттуу таасир тийгизип жатканын айтышкан. Tokyo Shoko Researchтин билдирүүсүнө ылайык, апрель–сентябрь айларында банкроттуктардын негизги себеби дал ушул кадрлардын жетишсиздиги болгон. Жылдын биринчи жарымындагы банкроттуктардын саны акыркы 12 жылдагы эң жогорку деңгээлге жетти.

Кадрдык кризистин кесепеттеринин бири — кызматкерлердин сырткы келбетине болгон талаптардын жумшартылышы. Компаниялар чачтын ачык түстөрүнө, тырмак боёгуна жана пирсингге болгон саясатын кайра карап чыгууда. Көптөгөн универмагдарда кызматкерлер үчүн милдеттүү форма талап кылынбай калды, ал эми такси айдоочулары ак мээлей кийүүгө милдеттүү эмес.

Сурамжылоолорго ылайык, студенттердин үчтөн экиси жарым-жартылай иштегенде сырткы келбетин өз алдынча тандагысы келерин айтышкан. Респонденттердин үчтөн бири катуу дресс-коддон улам жумушка орношпой коюшканын билдиришкен.

Ошол эле учурда Япониянын экономикасы 2025-жылдын үчүнчү чейрегинде дээрлик 2%га кыскарды. Себеби — АКШ президенти Дональд Трамп тарабынан япон экспортунa киргизилген бажы төлөмдөрү.