Украинанын президенти Владимир Зеленский согушту токтотуу үчүн Орусиянын президенти Владимир Путин менен түз сүйлөшүүгө даяр экенин билдирди. Бул тууралуу ал британиялык журналист Пирс Морган менен болгон маегинде билдирди.

"Эгер бул украиналыктардын тынчтыкка жетишүү жана адамдарды жоготпоо үчүн жалгыз жолу болсо, албетте, биз сүйлөшүүлөрдү жүргүзөбүз", - деди Зеленский.

Анын айтымында, Украинанын президенти бул кадамын Путинге «боорукер» катары көрсөтпөйт. Анткени аны «душман» деп эсептейт.

Ал өз сөзүндө, "Ачыгын айтканда, ал мени да душман деп эсептейт деп ойлойм, - деди украин лидери.

Ошол эле учурда Зеленский АКШ менен Евробиримдик дагы сүйлөшүү үстөлүндө болушу керектигин белгиледи. Анын пикиринде, АКШ президенти Дональд Трамп жаңжалды чечүүдө ийгиликке жетишип, Украинага ишенимдүү коопсуздук кепилдигин бере алат.  

Украинанын президенти ошондой эле президенттик шайлоону согуштун активдүү фазасы аяктап, аскердик абал жоюлгандан кийин дароо өткөрүүнү убада кылды.

"Согуш маалында шайлоо өткөрүүгө болбойт. Мыйзамдарды, Конституцияны өзгөртүү керек. Бул олуттуу көйгөйлөрдү жаратат. Биздин жоокерлер согуш учурунда кантип добуш беришет? Оккупацияланган аймактардагы эл кантип добуш берет? Согуштун айынан чет өлкөдө жашаган сегиз миллион украиналык кантип добуш берет?" - дейт, Зеленский. 

Ошол эле учурда өзүнүн легитимдүүлүгү тууралуу айтып жатып, 2019-жылы шайлоочулардын 73 пайызы ага добуш бергенин мактаныч менен эске салды.

Эске сала кетсек, буга чейин Орусиянын президенти Владимир Путин Зеленскийди Украинанын президенти катары тааныбай турганын билдирген. Анткени Зеленскийдин президенттик мөөнөтү өтүп кеткен. Путин ошондой эле Зеленскийдин тынчтык келишимине кол коюуга укугу жок экенин баса белгиледи.