7-майда Армения Республикасынын Россия Федерациясындагы Атайын жана Ыйгарым укуктуу элчиси Г.Б. Арсенян Россиянын Тышкы иштер министрлигине чакырылды. Ал Россия Федерациясынын Тышкы иштер министринин орун басары М.Ю. Галузин менен жолукту.

Дипломатиялык миссиянын башчысына Украина лидери Зеленскийге жакында Арменияда Орусияга каршы террористтик коркутууларды айтуу үчүн аянтча берилгени таптакыр кабыл алынгыс экени айтылган.

Москвада бул жагдайга байланыштуу негиздүү нааразычылык жаралганы баса белгиленип, Зеленскийдин мындай одоно аракетине расмий Ереван тарабынан тийиштүү терс баа берилбей жатканы Россия менен Армениянын өнөктөштүк мамилелеринин мүнөзүнө туура келбей турганы айтылды.

Элчи орус тараптын билдирүүсү боюнча Ереванга отчет жеткирүүнү убада кылды.

Белгилей кетсек, 4-майда Армениянын премьер-министри Никол Пашинян Ереванда өткөн Европа саясий коомчулугунун (ЕСК) саммитинде Зеленский менен сүйлөшүүлөрдү жүргүзгөн. Анда эки тараптуу мамилелерди өнүктүрүү келечегин талкууланып, өз ара кызыкчылык жараткан тармактарда кызматташууну тереңдетүүнүн маанилүүлүгү белгиленген.

6-майда "Известия" гезитине берген маегинде Берлиндин Өкүлдөр палатасынын мүчөсү Гуннар Линдеманн Армениядагы Евробиримдиктин саммити Орусияны провокациялоого багытталып, атайын уюштурулганын белгиледи. Линдеманн Украинанын президентинин саммитте болушу Орусияга каршы эң чоң провокация болгонун жана ал толугу менен атайылап жасалганын кошумчалады.